ارحل

بعد الحوداث والخراب مستنى إيه... بعد الإهمال واللى مات عاوز إيه... بعد البراءات للى قتلوا ناقص إيه؟
استنى بس رايح فين؟ هو رحيلك كده بالساهل مش لازم نفهم ونتحاسب ولا الدخول زى الخروج مصحوب بالدم كل خطوة فيه تزيد فى الهم تجرح قلوب أمهات حسرة على اللى راحوا وتفرق لمة صحاب ناقصهم واحد.. فاكر ولا نسيت؟
فاكر الحسينى لما كان بيصورك وأنت واقف تقتل فى كل اللى نصبك... ولا جيكا اللى اتقتل برصاص عبيدك ولا أطفال المدارس اللى للإهمال كانوا ضحيتك.. انشغلت بالتمكين ونصبت للوطن كمين... ولا أقولك ...
فين الشريعة والإسلام من القروض والحرمان من الجوع والقتل والكدب والخداع؟ فين الشريعة والصلاة ولا كله كان رياء فى رياء تجارة تضحك بيها على السذج والأبرياء؟.. ياعم الشيخ لو ده كان دينك فدينك مينفعناش... الدين يعنى الحياة يعنى المحبة والسلام يعنى البشر فى كل شىء سواء.... ولا أقولك... سيبك من كل اللى كان ... مش جريت ورحت على الأمريكان؟.. مش بعت الدم ونصبتله مزاد؟... وصدرت الهم فى كلامك وفى خطابك اللى أتحدى لو حد فهم مقصود كلامك؟.. ولا أقولك...
نسيت كدبك قبل الرئاسة ولا كانت مياصة؟... ولا شغلك فى ناسا؟... ياعم بكفياك غش وخداع ... بكفياك ضحك على الغلابة ... بكفياك إهمال وغشامة... ولا أقولك...
نسيت الجيزاوى ووفاء ولا الوفاء معدوم للى خان العهد فى الميدان اللى جرى وقعد مع سليمان اللى باع الدم فى محمد محمود لجل كرسى وطلع خازوق للى نصب نفسه إله وباع كل اللى معاه للى باع القضية وسط الصراع.. ولا أقولك...

صدقنى أنا مش بالومك أنا بالوم كل اللى عصروا اللمونة بالوم الغباء والطيبة بالوم على كل واحد كان لسه شايفك من غير قناع...
أقلك حاجة أخيرة ...
إحنا بطلنا نحلم عشان مبقيناش عارفين ممكن نحقق الحلم ده ولا لا... حياتنا ادمرت ومستقبلنا خسرناه.. أقرب ما لينا مات قدام عنينا.. مفيش مكان فى جسدنا إلا والشوارع ليها علامة عليه... صدقنى مبقاش عندنا حاجة نخسرها ولا بقينا حتى بنخاف من الموت بالعكس بقينا نتمنى الموت فى كل لحظة بنشوفك فيها... أنت فاهم الكلام ده؟... أنت سامعنى أصلا ولا مركز معايا؟.... رد علىّ... بقلك رد على....
ولا أقلك كفاية كلام... حاجة أخيرة لازم تعرفها...
ارحل وكفاياك دم ارحل مبقاش فيه مكان للهم ارحل طلعت عين أبونا... ارحل وخلى عندك دم.