نورهان عصام تكتب : رايحين بمصر على فين ؟

كل يوم قتلى وجرحى كل يوم اعتصامات واضرابات تسفر عن مقتل اطفال مالهمش ذنب فى حاجه وتوقف حركة الانتاج وناس مابقتش لاقيه تاكل
كل يوم مظاهرات وفتن طائفيه وسلطويه
كل شويه خطوط غاز بتتضرب ومحطات تتحرق
السياحه اتضربت ...البورصه وقعت ... الدين العام وصل تريليون و2مليار .....
كل يوم بيوت ومحلات بتتسرق وتتنهب وناس هنا وهناك بتتقتل
كل يوم خرااااب ودمااار....كل خطوه بنمشيها بنبقى مترددين ومش عارفين هنرجع تانى ولا نودع اهالينا قبل مانخرج اصلنا فقدنا الامان
والغريب اننا مش بنعمل حاجه غير اننا بنصبر نفسنا على الورق بس على تويتر على الفيس بوك بنصبر نفسنا ونقول اللى جاى احلى..مصر هتبقى بلد الامان...يعنى اللى جاى هيبقى اوحش من اللى راح...وننزل ونعمل مظاهره هنا وهناك وكل واحد مش بيفكر اللى فى نفسه وبس بيفكرنى بأنى اقول ماكده كده بايظه انا الحق اخد لى حاجه بدل مااطلع منها بولا حاجه
ونسينا الاهم نسينا ان اهداف الثورات وكل الاحتجاجات كانت المفروض لبلدنا علشان ننقذها ونحميها مش نخرب وندمر فيها والمشكله الاكبر بل المصيبه الاكبر اننا دلوقتى بقينا صم بكم عمى
مش سامعين استغاثه ؟؟؟ حد سامع معايا ؟؟؟؟؟ ايوه فى واحده بتصرخ بصوت عالى ...ركزوا كده اقفلوا كل اللى حواليكوا قفلوا الاصوات اللى بتقولكوا دمروا دى كده واسمعوا معايا ..عرفتوا مين اللى بيستغيث ولا كمان نسيتوا صوت مين ده للأسف كتير نسى الصوت ركزوا شويه يمكن تفتكروا انا سمعت الكلام
ده صوت بلادى
مصر بتنادى
ليه ياولادى
حررتونى علشان تدمرونى
انا اللى كنت فرحت بالنصر
وقلت لنفسى خلاص يامصر
لقيتى الولد والسند والأصل
لقيتى اللى يخاف عليكى ويحميكى
لقيتى اللى فى وش عدوك يقويكى
واللى بأيده يرفع علمك وما يحنيكى
لقيتى اللى يرجع النور لسماكى
واللى يبقى ضلك وحماكى
فجأه لقيت ولادى نصين
قال ايه مسلمين ومسيحين
لقيتهم نسيوا اللى ربتهم عليه
وانهم مهما كانوا مصريين
نسيوا اللى وعدونى بيه
نسيوا شهدائهم اللى ماتوا على ارضى
نسيوا انهم ماتوا علشان يدافعوا عن عرضى
نسيوا اخواتهم اللى ضحوا بحياتهم علشان هما يعيشوا
نسيوا وعدهم ليهم بأن دمهم مش هيروح من ايديهم
نسيوا لما كانوا متجمعين ايديهم فى ايد يعض متوحدين
لما كان يحكى واحد ويقول اللى فى ايدى مات جنبى وحقه فى رقبتى ودمه هو دمى
لقيتنى بضيع من بين ايديهم وهما مش شايفين
صرخت بأعى صوت وقلت ياولادى ماتسبونيش لكن شفتهم وهما بيسدوا اذانهم ولا كأنهم سامعين
سمعت كتييير كلام بكانى
سمعت اللى قال وانا مالى
وسمعت اللى قال ده حقى انا كده مش انانى
وسمعت اللى قال هعمل اللى فى دماغى
واللى قال مش هستنى تانى
واللى ساب شغله وقال مش شغال
واللى اعتصم وقال الرجوع ده محال هدفنا فى الاول هو المال
وسمعت برضه اللى صرخ وقال
بلدنا هتضيع خلونا نتحمل
خلونا نهدا ونبنى وبعدين نكمل
واللى ردوا وقالوا عليه جبان
واللى قاله انت فأر من الفئران
واللى قال ده عميل من نظام زمان
عملتوا ايه فيا ياولادى علمتوا ايه اسمعونى انا بنادى
انا بعتب عليكم وهستنى
ترجعوا تشوفوا قدامكوا
وتفتحوا عيونكوا واذانكوا
وترجعوا متوحدين
ترجع ايديكوا فى ايد بعض متجمعين
وتؤمنوا انكوا مصريين
وان مافيش فرق بين دين ودين