الإخوان ميعرفوش "الست سنية"!

الإخوان "تجار دين".. الإخوان "دعاة عنف".. الإخوان جماعة "إرهابية".. كل ده عارفينه.. وسمعناه أكثر من مرة.. لكن الجديد "لانج" واللي كان مفاجأة بالنسبة لى أن أتباع "حسن البنا" لا يعترفون ب"الست سنية"..!
وقبل أن يندهش القارئ، ويظن أن الست "سنية" مشيها بطال- لا سمح الله - أذكر الجيل الحالى من مواليد بسكوت "الشمعدان" و"البوريو".. بأن "سنية"- طيب الله ثراها- إن كانت ماتت.. أو ربنا يبارك في عمرها إن كانت على قيد الحياة.. كانت واحدة من السيدات اللي اتربينا عليها في فترة السبعينيات والتمانينيات، من خلال إعلانها الشهير على القناتين "الأولى والتانية".. مكنش فيه غيرهما وقتها.. عن ترشيد "المياه.. من خلال الجملة الشهيرة "يا ست سنية يا سايبة الميه تُخر تُخر م الحنفية".!
وقد يسأل قارئ- ودا من حقه علينا- وما دليلك على أن الإخوان لا يعرفون ربة الصون والعفاف الست "سنية"؟!
والإجابة- بعد باسم الله الرحمن الرحيم- تلك الدعوة الإخوانية المنتشرة على صفحاتهم بموقع "فيس بوك" ويدعون فيها الشعب المصري ب"ترك" حنفيات المياه في البيوت "مفتوحة" ليل ونهار.. ونهار وليل.. أي والله زمبؤلك كده.. ولو مش مصدقني ادخل على "جروباتهم" واسمع بعينك وشوف بودنك!!
وهدف الإخوان من الخطة دي إنهم "يرهقوا" الدولة.. ودا على أساس إننا عايشين في دولة تانية.. وناسيين إننا بنعاني من أزمة مياه.. وأكتر من 90% من الشعب "غلابة" ولو مية الحنفية انقطعت مفيش معاهم فلوس يشتروا ميه "معدنية".. وعلى رأي المثل "إيه إللى رماك على الميه المعدنية.. قال الحنفية الإخوانية"!