نوارة نجم: " مرسى بيلعب بالفتنة الطائفية زى مبارك"

كتبت الناشطة السياسية ، نوارة نجم ، على "تويتر" "الإخوان بيقولوا إن حسام اللى طلع مع محمود سعد بيقرا من ورقة... أنا مش مصدقة الغباوة اللى هم فيها دى، طب وافرض بيقرا من ورقة قال حاجة غلط؟".
وقالت نجم "مش فاهمة فيها ايه لما يصرفوا لكل واحد 3 ارغفة بس؟ المفروض تفطروا ربع رغيف بلدى وحتة جبنة قريش وتتغدوا ربع فرخة مشوية وخضار سوتيه وربع رغيف، وتتعشوا فاكهة وكوباية زبادى على حسب الريجيم اللى مكتوب فى مجلة حواء، مرسى منزل لكوا 3 ارغفة، يعنى حيبوظ الرجيم".
أضافت "يا ريس يا ريس ممكن تصرفوا لنا على الغدا ربع مشكل وعلبة كولسلو بدل الرغيف؟".
وتابعت "لا حازمون يزعلوا ليه؟ هم دول بياكلوا بعيش اصلا؟ دول لحمة ثم لحمة ثم لحمة.. العيش ده للمعفنييييين اللى بياكلوا جبنة نستو.. يعنى السلفيين بياكلوا بسم الله ما شاء الله... لا اشبع الله لهم بطنا".
وقالت نجم "المهم يعني... 3 ارعفة لكل فرد كفاية قوى.. وما تبقوش تعملوا عزايم غدا وعشا فى البيوت.. يا بخت من زار وخفف، كوباية شاى كفاية قوي، عيش.. حرية.. عدالة اجتماعية... كأن حد فهمهم ان دول التلات حاجات بالتحديد اللى احنا مش عايزينهم.. طب نهتف: يسقط الاستقلال طاه؟" .
أضافت " دكتورة من حزب النور السلفى بتقول انها كشفت على البنت اللى قالوا اغتصبها مسيحى وانها ما تعرضتش لاغتصاب ولا حتى تحرش"
قائلة " يا جماعة لو سمحتوا عايزين نهتم بالموضوع ده... مين اللى ادعى ان البنت تم اغتصابها وهيج الناس كده؟ ده فيه اشتباكات بين الشرطة والاهالي" .
وتابعت " موضوع العقوبة الجماعية ده قصة تانية، ان واحد مسيحى يغلط فى الصعيد فكل المسيحيين يتعاقبوا ويتهجروا.. ده العادى من بنك مصر، لكن الراجل مظلوم " .
أضافت " والحمد لله ان اللى كشف عليها دكتورة من حزب النور.. دى لو كانت دكتورة مسلمة من وزارة الصحة كانوا قالوا عليها فلول وضاحى خلفان مسلطها".
قائلة " العقوبة الجماعية دى عايزة اصلا علاج نفسى للناس.. دول مرضى فعلا باللى بيعملوه ده.. لكن اصلا الراجل مظلووووووووووم، البنت ماحدش عمل فيها حاجة ".
وأشارت أن "مرسى فى حملته الانتخابية قال: انا باطمنكوا على وفاء والمسيحيين والقمامة... انشراح بتشكر لك من قلبها يا ريس " .
قائلة "وفاء ام الشهيد محمد مصطفى.. اللى قالت له انت خدعتنا وانتخبناك ورجعت فى كل كلامك، والمسيحيين زى مانتو شايفين والقمامة زى مانتو شامين" .
وتابعت هو مرسى بيلعب بالفتنة الطائفية زى مبارك؟ وكمان مش عارف يسبكها وبيتكشف؟ واللى يكشفه حزب النور؟ هو عبيط ولا ايه؟".
وأضافت نجم "فاكرين لما قعد يقول لمحمود سعد: انا اظلم المسيحيين انا؟ معقول الكلام ده؟ ايه الكلام ده؟ حسسنا اننا بنكلمه فى كلام ابيح " .
وقالت "حاعمل ايه لما المسيحيين يطفشوا من البلد؟مين حيأكلنى كيك وكشرى وقلقاس؟مين كل ما اخش له محل يخصم لى النص عشان ابويا؟مش حاعرف اعيش من غيرهم" .
وتابعت "المسيحيين بيطفشوا من البلد................ واحنا معاهم " .
وإستطردت الناشطة السياسية "لفى بينا يا نهضة.. دوخينا يا نهضة.. خدينا شمال شوية.. هاتينا تحت القطر شوية.. ادينا ميتين يا نهضة " .
وتسائلت "اشمعنى لما واحد مسيحى بيتهم بحاجة كل المسيحيين فى القرية بيتهجروا؟ يعنى لما اتنين سلفيين فى السويس قتلوا واحد ليه مش كل السلفيين اتهجروا؟" .