نقطوني

عدم اللامؤاخذة كاتبة بالعامية عشان ده حوار عائلي، خدوا إخواتكوا والعبوا برة، عندي كلمتين لل«الإخوة الأقباط»، المصطلح ده بيستفزني، وأكيد بيستفزهم، وبما إنهم ضايقوني فاحستفزهم بيه.
أيها الإخوة الأقباط.. بس هه.
بتعملوا إيه؟ ها؟ هو كل ما واحدة تطفش من جوزها حتعملوا مظاهرة؟ يعني بعد أسبوعين مظاهرة عشان واحدة عملت السلطة لجوزها ناقصة ملح؟
البلد فيها حراك، يمكن مش أحسن حاجة أتمناها، بس أحسن من مافيش، إحنا كنا فين؟ وكل الناس بتتحرك، وعندها أمل - إلا أنا، مش باحب أحط أمل عشان ما اتصدمش - بس الشهادة لله، فيه حركة، ومش ممكن أبدا الحركة دي تثمر عن ولا حاجة، مش ممكن، يعني يوم ما تسود قوي، حيستمر النظام الحالي، وحيحاول يعمل تعديلات ويوصل لحلول وسط مع كل الناس والفئات اللي عاملة حراك عشان يكسب شوية شرعية. أنتم فين بقي؟ آآآه، أنتم في الكاتدرائية بتتمموا علي الحريم إذا كانوا نايمين في بيوت أجوازهم ولّا لأ.
يعني هي دي كل مطالبكم يا مسيحيين مصر؟ ده إحنا بنتنشق علي ربع العدد اللي نزل في الكاتدرائية لما بنعمل مظاهرة للحد الأدني للأجور، ولّا للتعديلات الدستورية. وماحدش عارف يكلمكم، خالص، بتزعلوا، بس أنا خلاص، مش حاخاف علي زعلكم، كلموني هنا زي ما باكلمكم. الحقوا في ظل الحراك الحالي ادخلوا واعرضوا مطالبكم العادلة، عشان ما تجوش بعد ما كل حاجة تترستق وتعيطوا. أيوه أيوه.. يطلع لي بقي عزت أندراوس ويقول لي: أبلة أبلة.. إحنا عندنا مطالب.. مصر تبقي مسيحية. طب ليه كده يعني؟ نفسي أفهم ليه الناس يبقي عندها مطالب عادلة وحقيقية وتسفهها بمظاهرة عشان واحدة زهقانة من جوزها، وموقع إلكتروني يبث كلام عصابي ذهاني مختل؟ هو فيه مصرية مش زهقانة من جوزها؟ عندنا بيعملوا خلع عندكوا بيطفشوا.. إيه؟
ما فيه ستميت حاجة تعملوها غير برنامج حياتي اللي أنتوا عايشين فيه ده. البرادعي.. مش أنا مش متحمسة له لعدم ارتياحي لآرائه الاقتصادية والسياسات الخارجية؟ بس بأقول لكم أهو انضموا له، لموا بعضكوا كده ووقعوا بيان التغيير بتاعه، سهلة أهي. أنزلوا مظاهرة ضد أي حاجة، إنشالله ضد انتهاك حقوق القطط السيامي، بلاااااش، اعتصموا لمطالب فئوية خاصة بيكم لوحدكم، حقوقكم الوظيفية في وزارات العدل والدفاع والصحة. أنتم إيه؟ مش زعلانين إن لكم رتبة معينة في الجيش ما تتخطوهاش؟ مش زعلانين إن فيه مناصب في وزارة العدل مش ممكن توصلوا لها؟ أقسام معينة في وزارة الصحة مش ممكن ترأسوها؟ عارفين ليه؟ عشان تصلحوا حمام في كنيسة لازم الريس يوافق. عشان أنتم مسيحيين.. مسيحيين.. مسيحيين. ازعلوا بقي علي أي حاجة من دول غير طفشان الستات من رجالتها. ده الرجالة المسلمين علي كده جمل بقي، الواحد فيهم بيتخلع ولا يقولش أي. فيه فرصة ذهبية لتحسين الأوضاع دلوقت، أعملوا أي حاجة.. احشوه.. خللوه.. علقوه في النجفة، حطوا في كل خياراية جوافاية وحطوه في الفرن حيطلع بطيخ. حتموتوني. حريم إيه اللي بتدوروا عليهم دلوقت؟ إحنا كلنا مسلمات ومسيحيات حنطفش من الدنيا كلها لو الحال فضل كده.