اسمي شهيد .. عنواني .. التحرير الجديد

لما قولت ظلم..قالو انسي القضية
قولت حق..قالوا غبية
ما تمشي في التيار وعيشي ..طاتي واوعي تكتبي او تثبتي عالورق رايك بجد!!!!! طاتي وطي ، خافي، نافقي واكتمي صوتك شوية احسن يقولوا منظرة دي عنجهة وعنطظيه طيب والله لقول رأيي بعفية هي موتة ولا اكتر طول ما شايفة الحق حق هو حقي . قالوا علينا عيال خيابا...راضيين بذل في عيشه كآبة قالوا علينا عيال غشيمه ..انتوا مين ماتبصوا لينا غيرنا اللي ورثتوه لينا من 30 سنة وزيادة قولتوا امشوا جنب الحيط .. مشينا فكتمتوا صوتنا بادينا
قولتوا هو ده زعيمنا ...قولنا مااااشي طب هو عامل ايه عشاني؟!
قولتوا في اكتوبر نصرنا ؟؟..طب واحنا مالنا حقق كام نصر لينا ؟!! سكتونا
وبتسالونا انتوا مين؟!
اول شهيد عاليمين وانت في ميدان التحرير كاتمين صوتنا من سنين
شغلونا .. ارحمونا.. عيشونا بالكرامة هجينا مالبلدي قالوا خاين ده عميل مهو اصله سيس .
طفشونا ..طفشوا خيرنا لغيرنا ومش عاوزني ابقي شهيد !
مش عاوزني اثور وهيج !
علي اتسبب في موتي وانا كنت لسه جاي اعيش!!
طيب اموت وغيري يعيش بس سيبوه يعرف يعيش طابور طوييييل عشان رغيف وياريته بيطلع رغيف ارحمونا ... انجدونا...ومحدش سمع الكلام !
100 شهيد ولا حد داري
اللي في القسام ومات.. واللي قعة علي حيطة صغره..واللي مات في البحر مات.. واللي شنق نفسه ومات..واللي حرق نفسه ومات واللي قتل عيلته ومات ... تفتكر مات من سكات ؟!! روحهم قامت تنتقم واحنا اللي صوتنا احيا اللي مات ابن الشهيد ، بنت الشهيد وارملة مليون شهيد تحت عجلة اي عيشة المهم تبقي عيشة و اهي هي عيشة والسلام !!
حيطة تدارينا ونتلزق فيها حتي الممات !!
لما اتولدت قالولي انتي انتي درجة اولي عشان انتي انتي وهما هما درجة تانية عشان هما هما ..كانوا عيال واتفرقوا قاموا عيطوا ، مش فاهمين ابعد ماتلدا ومرجريت عن عيشة وفاطمة ...حصة دين الحق مسيحي ..دكتور مسيحي بس ناصح انا صح وانت ما انت مسيحي. زي القمر بس خصارة اصله مسيحي ..الحق مسيحي امسك مسيحي .. والنتيجة...مسيحي يكره مسلمين ومسلمين تكره مسيحي ...اسكن في شبرا ده بعدكم اكل هناك يا قلبكم بقولك مسيحي!! اه يا نظام فرق بين مسلم مسيحي
ومش عاوني اطلع اصرخ واصيح واموت شهيد وبتسالونا انتو مين؟! تاني شهيد عاليمين وانت جاي عالتحرير ده انا شهيد وانت لا
انا قومت اقول للظلم لا
موت فدا كلمة حق وابقي افتكرني يا زمان ولسه بتقولي انتوا مين
احنا اللي غيرنا السنين
اكتب بقلمك يا زمان كملة شهيد صوته اتنبح دمه سرح يكتب بدمه تحيا مصر ويحيا كل اللي عاوزها تحيا
والله وفوقتي يا بلد
والله وقومتي تكسري كل حيطه خوف اتبنت .
ولسه بتسالونا انتوا مين؟!!
اسمي شهيد ، اول شهيد ، تاني شهيد ومليون شهيد في عنواني التحرير الجديد . هبة العفيفي - قاصة