جماعة الاغتيال "السلمي"!

كنت أتابع نقاشا مفتوحا على إحدى القنوات الفضائية العربية بين أحد أعضاء جبهة الإنقاذ والقيادى الإخوانى الدكتور جمال نصار، الذي أدان واستنكر محاولة البعض للزج باسم "الإخوان" في محاولة الاغتيال الفاشلة التي تعرض لها وزير الداخلية اللواء محمد إبراهيم.. وما أن قال إن "منهج الإخوان قائم على السلمية وضد العنف".. إذ ب"المفعوص" أبو نص لسان يهب واقفا كمن ضربه "آر بى جي" إسلامى صارخا:
- كداب في أثل وشه..
- هو مين إللى كداب؟!
- الراجل إللى بيقول إن منهج الإخوان قايم على "الثلمية".. طيب بأمارة إيه؟!
- لأ حاسب.. الناس دى بتاعة ربنا.. وقال الله وقال الرسول.. وهما أول ناس أدانوا محاولة اغتيال وزير الداخلية وتبرأوا منها ومن إللى نفذها..!
- هههههههههههههههه... والله إنت طيب قوى ياحج.. وعلى نياتك كمان.. قالوا للحرامى احلف قال جالك الفرج..
- قصدك إيه؟!
- هي عاداتهم ولا هيشتروها.. ما هما كل مرة بيغتالوا حد يرجعوا ويقولوا والنعمة مش إحنا دا حد غيرنا هو إللى عمل كده وبيلزقها فينا.. ويقعدوا يعيطوا ويتمثكنوا عشان يثعبوا على الناث..!
- حرام عليك تتهم الإخوان من غير دليل..
- لأ فيه بدل الدليل عشرة وعشرين.. عندك مثلا لما اغتالوا القاضى أحمد بك الخازندار.. ثاعتها "حثن البنا" بشحمه ولحمه أنكر معرفته بإللى نفذوا عملية الاغتيال.. وبعدها اغتالوا فهمى النقراشى باشا، رئيث وزراء مثر قبل ثورة يوليو.. وثاعتها قال "البنا" مقولته الشهيرة "ليثوا إخوانا وليثوا مثلمين".. وتفتكر لما حاولوا اغتيال الرئيث الراحل جمال عبد الناثر في المنشية.. ولما اغتالوا الرئيث الثادات.. و..
- حاسب عندك.. إللى اغتال السادات الجماعات الإسلامية..!
- ههههههههه.. والله حضرتك فعلا طيب.. ماهى الجماعات الإثلامية دى طالعة من تحت عباية الإخوان.. زى بالظبط ماتكون حضرتك غريب في بلد وقعدت في "غرزة" مشبوهة بتشرب شاى.. وفجأة البوليث كبث عليكم.. والنبى ثاعتها مش هيثدق إنك كنت بتشرب شاى..
- بس دا كان من زمان.. وهما تابوا.. وعملوا مراجعات فكرية لما دخلوا السجون.. و..
- يبقى يا بابا حضرتك مثمعتش عن المثل إللى بيقول "نهيتك ما انتهيت والطبع فيك غالب.. وديل الكلب ما يتعدل لو علقوا فيه قالب"..!