تمسك أعصابك بالعافية وإنت شايف الإخوان اللي افتكروا إن رابعة هي فعلا جمهورية الإخوان المستقلة.. فكروا ودبروا إنهم يعملوا "مقام لمرسي" عشان تتبارك به الناس "واللي ما بتخلفش تروح تزور مقام مرسي" "واللي عليها ضرعة تروح مقام مرسي" "واللي خايفة إن جوزها يتجوز عليها تروح تتبارك بمقام سيدى مرسي العياط". وبعد ما أعلن البلتاجي عن الخبر السعيد ونسوان الإخوان هاتك يا زغاريد وتصفيق وهتافات إحنا عندنا "ولي" وهما عندهم "مين" ومرسي من "أولياء" الله الصالحين. والرجالة في صوت واحد الله أكبر إحنا على حق ومرسي أحق يا "ولي الله" إنت حبيب الله. المرشد ضرب بوز في وش البلتاجي لما شافه لابس جلابية ومعلق سبحة في رقبته ومركب دقن واتريق عليه إيه اللي إنت لابسه ده؟ وإيه الدقن دي ومن إمتى إنت بدقن يا كداب؟ ويصرخ خلاص القطة أكلت ولادها. مرسي يتعمله مقام والناس تجيله من كل مكان يبقى المرشد إيه "كيس جوافة" ؟! لا..لا. تلاقي البلتاجي يضحك الضحكة الشهيرة بتاعته ويقرب منه ويهمسله مرسي ده أخوك الصغير وإنت الكبير يا كبير. وبعدين دي سبوبة عشان إنت شايف الدعم اللي كان بيجي اتقطع وإنت على علم بكل حاجة وهنعمل صندوق نذور ونقسمه مع بعض ماشي؟ المرشد برضه: لا يا بلتاجي الناس مقامات. ده ممكن مرسي يصدق بجد إنه بقى "ولي" وظهرت له كرامات. ده ممكن يتجنن وبعد شهر يبقى مجذوب رسمي وبتوع التحرير يشمتوا فينا ويقولو المجنون "أهو". ومن بعيد يسمع صوت صفوت حجازي ويسأله عن سبب المشكلة ويفهم المرشد إنه هو صاحب الاقتراح حيث يقول صفوت للمرشد إيه يا كبير ما انت شايف الإخوان على وشك أن كل واحد يرجع بيته ولازم نجمع ناس حولينا ففكرت نعمل إيه قلت لنفسي مفيش غير إننا نقول إن "مرسي ولي ومن أولياء الله الصالحين". وظهرت له كرامات وبكده تتلم الناس علينا وتتفرج على الإخوان بعد ما أصبحو مجاذيب والعالم كله يقول الإخوان ليهم شعبية كبيرة قوي وهو ده المطلوب. ويصرخ المرشد زي اللي لدغه "عقرب " ويقول الطريق ده غلط يا حجازي وآخرته وحشه ومفيش حد هيصدق ومش بعيد باقي الناس تمشي وتقول علينا كلنا مجاذيب ونخسر الجلد والسقط. ويرد عليه حجازي وهو زعلان طول عمرك "خواف " من كل حاجه إحنا خلاص ده قرار وهو ده الكارت الأخير ماشي؟ تلاقي البلتاجي جاب للمرشد وحجازي وباقي قيادات الإخوان جلاليب بيضاء وسبح وعمم خضراء وكل واحد طبلة ويطلب منهم افتتاح مولد "سيدنا مرسي العياط". ويلف البلتاجي رابعة ومعاه البخور ويغني "يا أم المطاهر رشي الملح سبع مرات" حي حي مرسي خلاص مش جاي. بعد كل الهبل والعبط صرخت صرخة سمعها كل الناس في المحروسة أنا مخنووووووووووووووووووووق!
