كنباوي وكنباوية.. الحلقة (91).. محاولة خطف مرسي من دار الحرس الجمهوري

كنباوية تحدث نفسها وتقول يا رب أبكي ولا أضحك؟ أبكي على اللي ماتوا أمام الحرس ولا أضحك على تخلف الإخوان اللي فكروا إنهم يخطفوا مرسي ويحرروه من قبضة الحرس الجمهوري؟ يسمعها كنباوي فيبتسم ويذهب إليها ليربت كتفها قائلا:
كنباوي: اضحكي على خيبة الإخوان إنهم افتكروا أن الجيش بتاعنا ورق وكارتون وإنهم حيعرفوا يهربوا مرسي شويه أغبيا مين قال لهم إن مرسي في الحرس الجمهوري؟ أكيد السيسي كان متوقع إنهم حيحاولوا يعملوا كده وأكيد مرسي في مكان الدبان الأزرق ما يعرفش طريقه السيسي دماغ مش بتاع كرنب زي رئيس الإخوان المعزول.
كنباوية: شوفتهم وهما بيطلبوا الجزيرة قبل الهجوم علشان تصور ويطلعوا الجيش هو اللي غلطان قدام الرأي العام والإعلام الخارجي ويبانوا همه مجني عليهم؟!
كنباوي: دول نزلوا صور متفبركة لأطفال سوريين ماتوا في سوريا في العدوان على إنهم أطفال الإخوان المسلمين.
كنباوية: أساليب منحطة قذرة لناس الكدب في دمهم دول مش حيوردوا على جنة أبدا يقتلوا العساكر والظباط ويستحلوا دمهم علشان الكرسي اللي همه ماعرفوش يصونوه ولا يملوه.
كنباوي: الناس كلها عرفتهم على حقيقتهم خونة وقتلة وسفاحين وتجار دين.
كنباويه: أنا لو من السيسي أفض الاعتصام ده بالقوة.
كنباوي: ما ينفعش حق التظاهر السلمي مكفول للجميع.
كنباوية: ومين قال إن ده تظاهر سلمي أمال السلاح اللي معاهم ده بيعملوا بيه إيه بيسلكوا بيه سنانهم بدل السواك؟!
كنباوي: الله يحظك يا كنباوية إنت بتهزري؟
كنباوية: ما هي حاجه تغيظ كله كوم والبلتاجي ده كوم تاني واقف يهدد فينا ولا همه حد والتاني اللي اسمه صفوت حجازي بيقوم علينا الإخوان ولا اللي بيقول إن السيسي عمل طالبان تانية وقاعدة تانية دول عايزين يضربوا ويتعلقوا من رموش عنيهم على إرهابهم ده ولا الشايب اللي مستخبي المرشد بتاعهم شوطه تاخدهم كلهم ونرتاح منهم.
كنباوي: البلتاجي وصفوت حجازي خايفين يسيبوا رابعة ليتقبض عليهم فيران بس همه حيفضلوا العمر كله في رابعة مسيرهم يزهقوا ويخرجوا.
كنباوية: يحصل إيه لو اتحاصروا حصار اقتصادي وما حدش دخل لهم أكل؟ مش أكيد حيخرجوا من اعتصامهم ده؟
كنباوي: ما حدش يقدر يعمل كده ده أسلوب ضغط بس غير مقبول على المستوى الإنساني لو هم كانوا عملوا فينا كده وأكتر من كده شويتين تلاتة لكن إحنا غيرهم إحنا عندنا رحمة لكن هم معدومي الرحمة.
كنباوية: أنا عارفة واتأكدت من ده لما شوفتهم بيموتوا الأطفال في الإسكندرية وبيرموهم من فوق العماير دول مش بني آدمين أبدا دول وحوش دول ملاعين الله ينتقم منهم على اللي عملوه في الأطفال والشباب في الإسكندرية.
كنباوي: ما هو قالها دلدولهم مرسي قبل ما يتعزل يا أنا والشرعية يا الدم.
كنباوية: كان بيهددنا بدقنه الشايبة قبل ما يغور في ستين داهية ده لازم يتحبس لازم على تهديده للمصريين وجرايمه في حق المصريين.
كنباوي: عندك حق بس مش دلوقتي علشان الاحتقان اللي موجود بين الناس موضوع حبسه ده لازم يتأجل شويه لحد ما الأمور تهدي الأول لازم يتقبض على البلتاجي وصفوت حجازي وبعد كده اللي يعمله ربنا يكون.
كنباوية: شوفت الراجل المهفوف اللي بيقول لأنصار مرسي لازم تقفوا جنب رئيسكم.
كنباوي: قصدك على القرضاوي؟
كنباوية: هو فيه غيره؟
كنباوي: ده مش مصري ده قطري ولو كان مصري ما كنش قال كده ربنا حيحاسبه على أقواله دي منه لله هو واللي زيه.
كنباوية: يمكن ربنا يهديهم في شهر رمضان.
كنباوي: دول ممكن يستغلوا الشهر ده في عمليات إرهابية ربنا يستر.
كنباوية: أكيد السيسي حياخد حذره منهم في شهر رمضان وعموما ربنا يسترها مع جيشنا وظباطنا وشعبنا.
كنباوي: رءوس الفتنة لازم يتقبض عليها علشان الديول بعد كده أمرها سهل.
كنباوية: المرشد وحجازي والبلتاجي هم رءوس الفتنة.
كنباوي: ربنا يسهل والجيش يقبض عليهم وبعد كده ممكن الأمور تستقيم شويه وأهه الإعلان الدستوري نازل يعني فيه خير وأمل في بكره.
كنباوية: الخير موجود بس الإخوان يحلوا من على سمانا.
كنباوي: يا ستي ما يحلوش بس ينقطونا بسكاتهم ويعيشوا معانا زي أي مواطنين عاديين ومصر فاتحة دراعاتها للجميع.
كنباوية: أقوم أحضر لك الأكل تلاقيك مت من الجوع؟
كنباوي: ده أنا عصافير بطني بتصوصو.
كنباوية: حالا أأكل عصافير بطنك أنا ليا بركة إلا عصافير بطنك بس إنت مش ملاحظ إن عصافير دي مش ماشية مع بطنك؟
كنباوي: خلاص بقر بطني بيجعر.
كنباوية: أيوه كده قول الحق اللي في بطنك مش عصافير ده بقر.
كنباوي: طيب يلا أكلي البقر بدل ما يقوم عليكي.
كنباوية: من عنيا يا كنباوي.
كنباوي: تسلملي عيونك يا كنباوية!