كنباوية تصرخ ويجري نحوها كنباوي مذهولا مخضوضا كنباوي: ياساتر يارب ليه كده ياكنباوية ؟ كنباوية: الراجل ظهر وبان ومسك المكرفون وبدل مايقول وحدوا الله قعد يهيج في أنصار مرسي ويقول لهم اننا باقون في الميادين لحين عودة رئيسنا محمد مرسي كنباوي: معلش اعذريه مش قادر يصدق اللي حصل لهم اصل اللي حصل لهم مش شوية برضه بعد ما داقوا الحكم والكرسي والسلطة يرجعوا يناموا على البرش من تاني ويرجعوا لأيام زمان ايام المطاردات والي انتي عرفاه كنباوية: ما همه اللي عملوا كده في نفسهم هو حد كان قال لهم يفتروا كنباوي: بيني وبينك دول طغوا مش افتروا، طوب الارض اتحايل على مرسي أنه يرضي الناس كلها مارضاش حد غير الإخوان أمريكا نفسها قالت له عين البرادعي رئيس وزرا واديله صلاحيات كامله يختار الوزرا والمحافظين رفض وركب دماغه كنباوية: ده بقي ديكتاتور كنباوي: سبحان الله اتمسكن لحد ما اتمكن اللي تفتكره موسي يطلع فرعون كنباوية: همه لسه ماقبضوش على البلتاجي والعريان ؟ كنباوي: لسه والمرشد كمان مستخبي بيقولوا انهم قاعدين في رابعة وخايفين يخرجوا بره التظاهر ليتقبض عليهم كنباوية: يعني حيفضلوا العمر كله قاعدين في الشارع مسيرهم يخرجوا ويتقبض عليهم كنباوي: كان نفسي يحكموا بما يرضي الله لكن همه حكموا بما يرضي المرشد والتنظيم الدولي ومكتب الإرشاد والإخوان المسلمين كنباوية: همه اللي جابوه لنفسهم بدل مايحكموا بالعدل ويحببوا المصضريين فيهم كرهوا المصريين في كل واحد بيتكلم بالدين كنباوي: دول لسه بيتاجروا بالدين وبيقولوا أن المسيحيين كانوا عامل رئيسي في ثورة 30 يونيو كنباوية: علشان كده بيحاولوا يحرقوا للمسيحيين الكنايس ؟ كنباوي: ربنا يستر انا خايف رمضان على الأبواب وخايف ساعة الفطار يعملوا عمليات إرهابية ضد المسيحيين أو ضد الجيش أو الشرطة كنباوية: المفروض السيسي يعمل حساب حاجة زي دي كويس كنباوي: السيسي الله يكون في عونه اللي عليه تقيل اوي شايل حمل بلد بحالها ربنا يحرسه وينجيه كنباوية: ده راجل من ضهر راجل زيه زي الفريق سعد الدين الشاذلي الله يرحمه كنباوي: ده كتب اسمه في التاريخ بوقفته جنب المصريين في ثوره 30 يونيو لولاه ماكناش عرفنا نطلع الإخوان من الحكم كنباوية: ما انت كمان ماتعرفش همه بيكرهوه قد إيه حسين أنه هو اللي هد مشروعهم الإسلامي المزعوم وهو في الحقيقة مشروع تمكين وفرض سلطة ونفوذ كنباوي: مشروعهم همه اللي هدوه بزناخة مخهم دول مابيفكروش همه اللي كان في إيدهم نعمه ماعرفوش يحافظوا عليها كنباوية: على قولك شوفت المصريين فرحانيين إزاي بقدوم شهر رمضان من غير الإخوان كنباوي: ده أحلي رمضان يجي علينا من سنين كنباوية: دول كانوا هم وانزاح احنا كده نبتدي نشم نفسنا وهوا نضيف من غير إخوان كنباوي: انا اتشاهدت ساعة ما السيسي عزل مرسي كنباوية: وكل نسوان الحارة زغرطوا وكسروا قلل وازيار كنباوي: فرحة المصريين بعزل مرسي فاقت فرحة المصريين بتنحي مبارك كنباوية: ايش جاب لجاب مبارك رغم بلاويه كان رحمة عن مرسي كنباوي: عندك حق والف حق مبارك كان بيحكمنا بدماغه مش بدماغ حد زي مرسي كنباوية: بكره احلي بأذن الله كنباوي: يسمع منك ربنا ورمضان كريم كنباوية: الله أكرم !