كنباوى وكنباوية.. حلقة رقم (88).. أبو إسماعيل مستخبى فى الدره !!

أبو إسماعيل الشاحن بتاعه ضاع.. والخط بقى مقطوع.. وهو شاريه من أسبوع.. أبو إسماعيل مش في رابعة ليه.. أصل الإسهال عليه.. أبو إسماعيل راح فين ؟.. بيعزم على الثوار في الحسين.. أبو إسماعيل دقنه بتوجعه.. عاوز حد يرجعه.. أول ما بقت دندرة.. أبو إسماعيل لبد في الدره.
هكذا راحت تدندن كنباوية أول أيام ثورة 30 يونيو فسمعها كنباوي فذهب إليها مبتسما مداعبا متسائلا:
كنباوي: سايبة مرسي وماسكة في أبو إسماعيل ؟
كنباوية: مرسي كفاية عليه اللي هو فيه واللي حيحصل له لكن أبو إسماعيل لا حس ولا خبر فص ملح وداب الناس دي بتكدب وتصدق نفسها الله يكون في عونها.
كنباوي: ده مش هو بس اللي اختفى صفوت حجازي كمان وعاصم عبد الماجد والشلة إياها دي بتاعة الهلفطة ربنا ياخدهم ويريحنا منهم.
كنباوية: آمين يا رب فرحة قلبي بالمصريين النهارده مالهاش حدود منظرهم يشرح القلب وهمه أيد واحدة وعلى كلمة واحدة وقرار واحد وفي نفس واحد لازم يرحل لازم يمشي كان حتة فيو تحفة.
كنباوي: فيو إيه يا روح أمك ماتكلميني عربي لسانك إيه اللي عوجه كده ؟ ويعني إيه فيو دي ؟
كنباوية: فيو يعني منظر يا كنباوي منظر.
كنباوي: طيب ماتقولي منظر ولا انتي لازم تتمنظري عليّ.
كنباوية: وفيها إيه لما اتمنظر عليك مش جوزي وحبيبي اللي ماليش غيره.
كنباوي: بقى ده وقت منظرة يا كنباوية ؟ مش تستني لما نشوفها حترسى على إيه ؟.
كنباوية: على كل خير، حترسى على أن مرسي حيغور في داهية.
كنباوي: مش بالساهل، قلنا إنه مش بالساهل.
كنباوية: تمرد اديتله مهلة 48 ساعة للتنحي ولو ما تنحاش هى حتصعد الموقف.
كنباوي: يعني حتعمل إيه ؟
كنباوية: من ناحية حتعمل فهى حتعمل كتير وهى قادرة اللي خلاها تجمع توقيعات 22 مليون مواطن مصري في شهر ولا شهر ونص يخليها تقدر تعمل كتير.
كنباوي: على قولك دي عيال قادرة وفاجرة ومعاها الحق والمصريين كمان.
كنباوية: خلي مرسي يشوف ويعرف أن المصريين مش لقمة طرية وأنهم عضمة ناشفة وخلي الحرس الجمهوري اللي هو متحامي فيه ينفعه.
كنباوي: مش حينفعه الحرس الجمهوري وخصوصا أن السيسي بعد دراسة جميع الاحتمالات للخروج من الأزمة خرج علينا ببيان من شوية يمهل فيه الدنيا كلها لمدة 48 ساعة وبعد كده هيخلص المسائل.. يا بت أنا بقيت أكره مرسي كره العمى مش بطيقه ماكرهتش مبارك أكتر منه مبارك برقبته مبارك ما تاجرش بالدين ولا باعنا لفصيل تاني سرقنا أه خدعنا لأ سرقنا عيني عينك مانصبش علينا ودي ميزة مبارك اللي تخليه برقبة مرسي.
كنباوية: زمانه فرحان في مرسي.
كنباوي: أكيد وأكيد معنوياته مرتفعه دلوقتي لما الناس عرفت قيمته وحكمه من حكم غيره
كنباوية: ربنا يمسيه بالخير مطرح ما هو قاعد.
كنباوي: بس يارب الثوار والمتمردين يصبروا على القاعدة في الميادين علشان السو يعرف أنها مش حتتفض بسهولة وأنه لازم يغور في داهية ويرحل ويتنحى.
كنباوية: مش حيمشوا، ده الواد شلتة هو كمان في التحرير من إمبارح.
كنباوي: ربنا معاه هو واللي زيه دول شباب زي الورد.
كنباوية: ما هو كله لمستقبلهم ومستقبل عيالهم كفاية احنا شوفنا المرار مش بالضرورة هم كمان يشوفوه لازم هم يعيشوا أحسن مننا.
كنباوي: عندك حق احنا تعبنا كتير واتظلمنا كتير واتبهدلنا كتير ربنا يجعل زمنهم أحسن من زمن غيرهم.
كنباوية: الناس بتقول إنها مش نازلة أشغالها وحتخش في اعتصام مفتوح لحد ما يرحل النظام.
كنباوي: شغل إيه ؟ ده وقت شغل مصر ومستقبلها أهم من الشغل.
كنباوية: على قولك الشغل مش حيطير وهى الناس لو قعدت يومين من غير شغل مش حتلاقي تاكل ؟
كنباوي: ماحدش في مصر بيبات من غير عشا حتى في أحلك أيام الفقر ربنا بيسترها دايما مع المصريين.
كنباوية: ونعم بالله ربنا ده كريم لأننا شعب طيب ويحب الخير لكل الناس واللي قسمنا وفرقنا هو حكم الإخوان ربنا يجحمهم في ناره.
كنباوي: ربنا مسلط عليهم نفوسهم وكفاية أنهم عارفين أن خلافنا معاهم مش خلاف ديني ولا عقائدي ده خلاف سياسات ومنهج وإدارة واقتصاد وتمكين واستحواز.
كنباوية: سيبك منهم ويلا نقوم ناكل لقمة ونتفرج على الست لميس الحديدي اللي بتدينا أمل في أن مرسي راحل راحل.
كنباوي: يلا رغم أني كنت واخد منها موقف إلا أني حسيت أني ظلمتها لأن الرؤية بالنسبة لي ماكانتش واضحة قبل كده لكن لما فهمت عذرتها في تحاملها عليهم ربنا يسامحني بقى كنت ظالم البنية.
كنباوية: المسامح كريم وربنا كريم وحيسامحك وهى كمان لو عرفت حتسامحك يلا بينا ناكل.
كنباوي: يلا واللي فيه الخير يعمله ربنا !