مرسي قاعد على بلاط القصر ويده على خده ويغني: يا حلوة يا بلحة يا مقمعة وكستي أخواتك الأربعة ثم يهتف يسقط يسقط حكم المرشد، يدخل البلتاجي لابس جلابية بلدي وشال ومغطي وشه زي الحرامية بينما مرسي مرعوب وخايف جدا ويصرخ: والنبي أنا ماليش دعوة المرشد والشاطر هما السبب ومستعد أعمل أي حاجة ولو معاك استمارة تمرد امضي عليها دلوقتي أنا تحت أمرك ومستعد اعتقل الشاطر والمرشد عادي جدا ولو عايزني أمشي من القصر أمشي. البلتاجي يقرب منه: فيه إيه مالك يا دكتور تعتقل مين وتمشي فين دول أصحاب النعمة عليك فعلا والله خيرا تعمل شرا تبقى طول عمرك جبان. الريس ضاحكا: الله يقرفك هو انت يا بلتاجي.. والله افتكرتك واحد من الثوار إيه اللي عامله في نفسك ده انت خايف صح ولا بقيت حرامي ؟ البلتاجي يبص نحوه: ده تنكر مش خوف خالص انت عامل إيه الجماعة عايزين يطمنوا عليك ؟ الريس يلطم: عامل إيه.. هو انتم قاعدين في المريخ ما أنا حالي حال الشوم متحاصر من كل حتة زي ما انت شايف محبوس ومرعوب والثوار على باب القصر وممكن وأنا بتكلم معاك يدخلوا علينا ويعملوا زي ما عملوا في القذافي مش أنا قلت قبل كده: إن القذافي كل يوم معايا في المنام وحاسس كده والله أعلم إنها نفس النهاية مش عارف ليه. البلتاجي: اسمع بلاش الكلام الفارغ ده بلا قذافي بلا مبارك احنا الإخوان في كل مكان انت خليك هنا واحنا هنخلص على المصريين ونرجعلك.. اوعى تفتح الباب لحد إلا لما يقولك كلمة السر"المرشدة" بتسلم عليك فهمت ؟ الريس يتعجب: المرشدة يعني إيه ؟ البلتاجي: الطبيعي هما هيقولوا المرشد لكن لازم نعمل تمويه عشان ما حدش يعرف يوصلك.. صح ؟ الريس: يعني المرشد بقى مرشدة.. هو عمل عملية ولا تنكر زيك كده ؟ البلتاجي يضرب وشه بالقلم: ياعم اخلص طول عمرك فهمك على قدك أيوه دي كلمة السر.. خلاص فهمت ؟. الريس: قول للجماعة بلاش "عند "ونخلع بدري بدري أحسن من البهدلة خلاص الشعب قال كلمته ومش هيرجع. البلتاجي بغيظ: انت تسمع الكلام وتنفذ وبس ماشي ؟ الريس: السمع والطاعة !
