يوميات رئيس.. حلقة رقم (7).. مرسى يلم هدومه ويخلع من القصر ويقول يا فكيك

مرسي مشغول بجمع هدومه ومتعلقاته من القصر ويبحث عن الغيارات الداخلية خايف حد يعملة عمل.
مدير مكتبه: إيه يا ريس كفى الله الشر مالك بتلم هدومك هو انت عليك إيجار متأخر ولا إيه.
الريس زعلان: بطل هزار تافه وحياة أبوك واجمع هدومك بسرعه عشان نخلع من هنا.
مدير مكتبة: طب الأول ناخد رأي المقطم.
الريس يضحك: مقطم مين يا محترم دول كلهم قفلوا موبايلاتهم وشكلهم كده باعونا ؟.
مدير مكتبه: عيب عليك يا معلم كل الأرقام الجديدة معايا.
ويطلع موبايله ويطلب رقم: ألو المعلم كرشة ازيك يا معلم إيه أخبار الكرشة ويبص على الريس الواد شغتة خايف ومرعوب وبيلم هدومه من المحل.
الريس: انت كنت بتكلم مين يا خروف انت إيه كرشة وشغتة دي.
مدير مكتبه: يا ريس خليك مدردح ده سيم عشان لو حد مراقب الموبايلات يبقى في الأمان يا مان صح الكلام ؟
الريس: طيب قوللي كنت بتكلم مين يا عضمة ؟
مدير مكتبه ضاحكا: أبدا كنت بكلم الشاطر واسمه الحركي المعلم كرشة وانت اسم حضرتك شغتة.
الريس يلطم: يا نهار أسود على آخر الزمن من ريس جمهورية إلى صبي من صبيان المعلم كرشة لا لا ياعم أنا هروح عند حبيبي أبو هنية.
مدير مكتبه: يا ريس شوف المؤيدين على قناة الجزيرة ملايين انت خايف ليه العمر واحد والرب واحد.
الريس: افهم يا بني آدم دول لو وصلوا القصر يبقى نقول يا رحمن يا رحيم. بصراحة أنا تعبت من الشغلانة دي الشاطر قال لي إني هعيش في عز ونعيم واللي شوفته جوع وجحيم وهو هارب وسيبني للمتظاهرين لوحدي دى مبادئ الإخوان.
مدير مكتبه: دي خطة يا ريس وهما عارفين بيعملوا إيه صدقني.
الريس يصرخ: انت عايز تقعد اقعد.. أنا لا.. وأنا مستعد أتنازل عن الحكم لأي حد من الإخوان بس اعتقوني لوجه الله القذافي كل يوم بيجيني في المنام أنا خايف قوي أحصله وتبقى نهايتي بعد الشر بعد الشر زيه.
مدير مكتبه: إن شاء الله هتعدي صدقني _تليفون الريس المباشر يرن_ أوباما يا ريس
الريس: ينفع كده يا صديقي تسيبوني للشعب زي الإخوان ما سابوني وهربوا في أماكن مجهولة.
أوباما: مرسي اسمع أنا معاك بس مصلحة أمريكا مش معاك وعشان كده فيه بيان هيطلع ضدك دلوقتي ويقفل السكة في وشه.
الريس يضرب كف بكف ويولول يا نهار أسود وآدي أمريكا باعتني كمان كنتى فين يا لأ لما قلت آه آه.
مدير مكتبه: وبعدين
الريس ماسك شنطة هدوم: هى بقى فيها بعدين اخلع وقول يا فكيك ويخرج من الباب الخلفي هاربا من القصر !!