يوميات رئيس.. حلقة رقم (5).. مرسي: اليوم ده شكله مش هيعدي على خير!

ازدحام في قصر الرئاسة كاميرات هنا وهناك رجال ونساء بمناسبة خطاب الريس اليوم كل هذا والريس ينظر حوله يبحث عن شخص معين لا يجده وفجأة يدخل مدير مكتبه بالملابس الداخلية وسط ذهول الجميع بمن فيهم الريس نفسه.
الريس بعصبية:هو ده وقته لازم تروح المصيف النهارده ده انت مفيش عندك دم.
مدير مكتبه يبص في الأرض: مصيف إيه بس وهباب إيه أنا جاي من البيت قلت أضرب لي حجرين شيشة على القهوة اللي قدام القصر عشان النهارده يعدي على خير.
الريس: إيه ده معقولة فيه قهوة قدام القصر؟! هي وصلت لحد كده لا الموضوع بقى مستفز قوي.............
مدير مكتبه بعصبية: يا عم هو ده اللي مزعلك القهوة ليها سنة انت دخلت القصر من هنا والقهوة اتعملت من هنا.
الريس يشخط فيه: هو الطيب يتعمل معاه كده ماشي خد معاك مدير أمن القصر واقفل القهوة دلوقتي.
مدير مكتبه: انت جاي في الهايفة وتتصدر؟.. القهوة دي بتجيب دخل في الشهر أكتر من 50 ألف جنيه بتروح المقطم.
الريس: مش تقول إن القهوة تبع المقطم.. طب إيه علاقة الشيشة بالهدوم ولا من شروط ضرب الشيشة الخلع؟!
مدير مكتبه: يا ريس الموضوع أكبر من كده بكتير.
الريس: إيه الموضوع قولي وبسرعة عشان اليوم ده شكله مش معدي على خير.
مدير مكتبه: أنا يا دوب قعدت على القهوة ولقيت 3 بس 3 يعني حاجة كده لا مؤاخذة ما ينفعش معاهم كلمة "بم" طلبوا مني كل اللي في جيبي والساعة والموبايل والدهب يعني من الآخر كده كل حاجة.
الريس ضاحكا: وليه مقلتلهمش إنت مين؟
مدير مكتبه يلطم: قلت ويا رتني ما قلت وهما عرفوا ا أنا مين وعينك ما تشوف إلا النور عايزيني أخلع كله. ولولا ما تدخل صاحب القهوة الله يستر عرضه كنت طلعت بلبوص من القهوة وكانت بقت فضيحة بجلال وإنت مش ناقص.
الريس منفعلا: بسرعة خد مدير الأمن واقبض عليهم دلوقتي والعيال دي لازم يتعلم عليها ويطلعوا من القصر بلابيص.
مدير مكتبه: بلاش أحسن هما قالوا لو حد قرب منهم ويبص على الريس الدور عليه.............
الريس: فعلا الشعب تعبان لازم نتحملهم شويه مش مشكلة وبلاش تقعد على قهاوي تاني ومش لازم تقول لهم إنك مدير يا سيدي.
مدير مكتبه: توبة إني أقول إني شغال معاك ولا أعرفك واشتم معاهم عليك بغيظ.. ده الشعب بيحبك حب..
الريس: بكره الشعب يعرف إني مضطر أبقى ريس وغصب عني قاعد في القصر يمكن يسامحني وإني ريس بالعافية وأنا والشعب مفروضين على بعض، ضاحكا، إيه ده الشعار الجديد هقوله النهارده في الخطاب بتاعي.
مدير مكتبه: لا..لا..لاااااااااااااااااااااااااااااااا