العيد "فرخة"

من أهم أغاني العيد اللي جيل كامل اتربي عليها "تم البدر بدري" آه دي أغنية العيد برضه لأنها بتيجي في آخر رمضان واللي جيل كامل كان فاكر أنه عنده مشكلة في السمع لما كان بيسمعها " كمل بدري بدري" وكمل دي كانت بتعود على شهر رمضان الكريم.
وبالرغم من أنه ما فيش فرق بين المعنيين إلا أن الأغنية دي صدمت ناس كتير في سمعهم لأنهم كانوا فاكرين طول حياتهم
أنهم بيسمعوا دبة النملة.
وأغنية أهلا أهلا بالعيد.. مرحب مرحب بالعيد واللي أنا فاكراه عنها أن كان فيه بنت صغيرة جارتنا كان عندها أغرب لدغة في الدنيا.. كل الناس عندها لدغة في " ر" فتقولها مثلا " ل " أو صعوبة في نطق " ع " فتنطقها " أ" لكن دي كانت أول مرة ألاقي حد بينطق ال " ح " " خ " وبتفكرني بالبنت أم شعر أصفر اللي ضارباه في الخلاط وعاملة فيها أجنبية وبتقول كل الكلام العربي مع نطق الح " خ " وبكدة بقت أجنبية بتاعة بلادهم ودي بقي سابت كل الأغاني بتاعة العيد وبتغني العيد " فرخة "وأجمل " فرخة " تجمع شمل قريب وبعيد.
واستكمالا للحيرة اللي حيرتها لنا الأغنية دي.. صاحبتنا اللدغة ما تجيش حاجة جنب آلاف مؤلفة من الشباب والبنات اللي كبروا ووصلوا ل 20 سنة واتفاجأوا أن ما فيش واحد اسمه "سعد نبيهة " ولا فيه نبي كمان اسمه " سعد ".. واكتشفوا جميعا أن الأغنية دي مع الاعتذار للست صفاء أبو السعود.. دمرت ثقافة جيل كامل لأنهم قضوا نص حياتهم بيتأكدوا من وجود سعد " وفي الآخر الأغنية طلعت بتقول " سعدنا بيها " بيخليها ذكري جميلة ليوم العيد.