باسم يوسف مدافعا عن محمد صلاح: إنتوا مش عارفين الصورة في الغرب عاملة إزاي

محمد صلاح، دافع الإعلامي باسم يوسف، عن النجم المصري العالمي محمد صلاح، إثر دعمه للقضية الفلسطينية بمقطع الفيديو نشره صلاح أمس، وحقق تفاعلا غير مسبوق.

باسم يوسف نشر صورة له برفقة صلاح وعلق قائلا: تحديث للناس اللي قرأت البوست، لو ما قريتش معلش اقرأ البوست وبعدين ارجع هنا: انتم مش عارفين الدنيا في العالم برة العالم العربي كانت مشحونة قد إيه، صورة تانية خاااااااااااااالص غير اللي واصلة للعالم العربي.
وتابع باسم: الرواية المتصدرة كانت مرعبة وكان من المستحيل الدفاع عنها تحت أي مسمى لدرجة إن مجرد التعاطف مع المدنيين في حد ذاته تساوي إنك موافق على دبح الأطفال، أنا شخصيا صدقت وعشان كده عملت الفيديو إياه بتاع الصورة اللي هنا في الغرب، فاكرينه؟ انزلوا الصفحة دوروا عليه، الناس كانت بتتهكم عليا وتقولي إزاي تصدق كده، تاني انتم مش عارفين الصورة هنا إيه. في إنجلترا الصورة مشحونة احترمت أمريكا. محمد صلاح لو كان طلع وقال الرسالة اللي في الفيديو اللي مش عاجب ده كان زمانه اندبح.

وأضاف: طب اشمعنى انت يا باسم عملت كده؟ والله دي مخاطرتي وده قراري وأنا مش عارف ظروف الناس، وكتير، كتير قوي، عدى عليا أوقات وسكت عشان الظروف قوية، قوية قوي، اللي بيمر بظروف صعبة بيقدر، اللي بيتفرج من بعيد سهل يزايد، لو أنت عملت حاجة عظيمة وضحيت، برافو عليك. أنت عظيم.. انت ملهم، لكن لو فعلا مريت بالتجربة انت من جواك عمرك ما حتفرضها على حد، يا أخي ده حتى في الإنجيل بتناجي ربنا وتدعيه: ولا تدخلنا في التجربة. مش: ونجنا من التجربة. لا بلاش تدخلنا خالص. عشان احنا ضعاف. احنا صغيرين قوي. قوي. الواحد بيعمل الحاجة عشان يرضي نفسه مش عشان يتنطط بيها على خلق الله".

وتابع: أنا شفت الصورة دي في كذا صفحة مع تعليق: محمد صلاح متصور مع فخر العرب، ده غير بوستات تانية كتيرة جدا يا اما بتقارن لقائي مع الفيديو بتاعه أو بتقلل وتهمش وتتريق على فيديو صلاح. طيب كذا نقطة:
- المفروض في عالم طبيعي إن لعيب الكورة أو حتى الكوميديان يكونوا في الصفوف الأولى للدفاع عن القضايا الإنسانية، ده دور الإعلام، والسبب إن اللي بيحصل غير كده إن الإعلام بيفشل في ده بل وبيزيد الأمور سوءا فتتجه الناس للأشخاص الناجحين في مجالهم عشان يغطوا على فشل في مجال مش بتاعهم وده أول السكة في إننا بنظلمهم معانا. صلاح لعيب كورة. لا يتدخل في السياسة من اول يوم واحتفاله بالكريسماس مش رسالة سياسية.. الاحتفال بأي مناسبة ده نشاط انساني بحت ولا يجب مقارنة صورة جنب شجرة كريسماس او حلويات المولد بوضع علم او رمز للتضامن.

واصل باسم يوسف حديثه: تعزيته في موت ملكة إنجلترا هو أيضا فعل إنساني وليس سياسي. صلاح أو أي لاعب كرة لو كان بيلعب في دوريات الخليج ولا قدر الله لو أمير أو ملك أو شيخ أو حاكم الدولة أو الإمارة أو المحافظة اللي فريقه بيلعب له توفاه الله كان حيكتب تعزية برضة لأن ملكة إنجلترا عند الإنجليز اللي بيلعب عندهم مكانتها في قلوب ناس كتير جدا زي مكانة هذا الملك أو الأمير في قلب شعبه. فده بروتوكول وليس فعل سياسي.


مقارنة فيديو صلاح بلقائي ظلم بين

- مقارنة فيديو صلاح باللقاء بتاعي هو ظلم بين. لأن الكلام مش شغلة صلاح. ولأن طلاقة اللغة مش شغلة صلاح. لا صلاح حيعرف يتكلم ويحاور زيي ولا أنا أقدر ألعب كورة زي صلاح. يا جدعان ده أنا أكبر إنجازاتي الكروية إني عملت تلت عمليات غضروف وأنا عندي ركبتين اتنين بس!!!! ده أنا خدت كباري بعدد شعر راسي. ولو على اللغة، صلاح، اللي ما دخلش مدارس لغات زيي بيتكلم إيطالي. أنا معرفش كلمتين إيطالي على بعض.

- صلاح بالإنجليزي المكسر والأداء "الفلات" أو المخطوف زي ما ناس وصفته، الأداء "الوحش" ده عمل ملايين التفاعلات والمشاهدات. كونه بقى إن: الكلام مايع، مافيش إدانة واضحة، مسك العصاية من النص. قصف الجبهات مش دور صلاح خالص. وأصلا هو فيديو غير موجه لينا. ورب فيديو بسيط من غير عياط ومن غير نرفزة ومن غير شتيمة ومن غير ادانات وشجب وعياط ودموع لكن يوصل برة ويغير صوت واحد ده ابرك بكتير.


- واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر أكتر من العلن، فاتح بيوت أنا وانتم مش عارفين عددها.، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الأنظمة واكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ آه بالنسبة لك، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده.

- فاكرين لما صلاح نزل صورته في القدس وكتب تضامن؟ اتشتم برضة. طيب لما يبقى عندنا واحد بوزن صلاح وكل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك.

-أنا مريت بالفترة دي: ساكت ليه، ما تعمل زي فلان ما تقول زي علان؟ كل واحد وظروفه وحساباته. لا يكلف الله نفسا إلا وسعها. كل واحد أدرى بالضغوط اللي عليه. بلاش نكون إحنا كمان سبب زيادة في الضغط عليه.
- في الآخر كل واحد ورأيه. كل واحد يحب ويكره اللي هو عايزه. لو حبيت صلاح أو كرهته أنت حر، البوست ده مش حيغير حاجة. ودي صورتي مع فخر العرب، محمد صلاح.


ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.