سيف شكري لاعب منتخب المصارعة: أبويا مديون عشان يصرف عليا ويجيبلي أكلي (فيديو)

كشف سيف شكري لاعب منتخب مصر للمصارعة، عن سبب هروبه خلال عودة بعثة الفريق في مطار دبي ثم ظهوره بعد ذلك في بولندا.

فضيحة جديدة في اتحاد المصارعة
وهرب اللاعب سيف شكري أثناء تواجده في مطار دبي ترانزيت خلال رحلة العودة إلى القاهرة، ليسجل حالة هروب جديدة في اتحاد المصارعة.
سيف شكري يبرأ نفسه من الهروب
ونشر سيف شكري مقطع فيديو عبر حسابه الشخصي على موقع التواصل الاجتماعي فيسبوك وعلق عليه قائلا: يمثل ما أحدثكم عنه واحد في المئة من قصتي واللي مريت به، وارجو ألا يزايد عليا أحد في حبي لوطني، مصر في قلبي ودمي ومحدش يقدر يشكك في ده لحظة واحدة، شكرًا لكل حد دعمني، شكرًا لكل حد وقف جنبي، أشوفكم على خير.
وتابع سيف شكري في الفيديو: "كل الناس بتسأل أنا عملت كده ليه، عملت كده عشان أبويا مايبقاش مديون بسببي، أبويا مديون عشان يعرف يصرف عليا ويجيبلي أكلي وفيتاميناتي وبروتيناتي لأني المفروض ليا أكل معين، بالإضافة إلى معداتي للمصارعة ولبسي".
وأضاف اللاعب: أنا بطل إفريقيا 5 مرات ومش باخد 1% من اللي بياخده لاعب قاعد دكة طول السنة في الأهلي أو الزمالك لكرة القدم، أو إني مفيش ولا حتى إذاعة راديو بتتكلم عني.
وواصل حديثه قائلا: أنا مابقاش واخد بطولة إفريقيا أكتر من مرة ومحدش يستقبلني في المطار ولا وزارة الشباب والرياضة تعرف اسمي إلا بعد ما مشيت.

بطل أفريقيا 5 مرات
وأضاف سيف شكري: أنا بطل إفريقيا 5 مرات مرتين بالميدالية الذهبية ومرتين بالفضية ومرة بالبرونزية، إلى جانب كوني مصنف عالميًا أكثر من مرة وبطل العرب.
وتابع: أول مشاركة دولية ليا كانت في 2019 في بطولة إفريقيا في تونس كان عندي 18 سنة، وقتها جبت ميدالية ذهبية في بطولة إفريقيا للشباب والبرونزية في بطولة إفريقيا للكبار، وشاركت في البطولتين بسبب تميزي.
وأكمل سيف شكري: "الفرحة مكنتش سيعاني وأنا شايف علم مصر قدامي والنشيد الوطني بيتعزف وتعبت أوي عشان اللحظة دي وأبويا وأمي تعبوا معايا جدًا وزمايلي والمدربين، أبويا صرف عليا كتير جدًا عشان اللحظة دي، وأنا بلعب مصارعة وأنا عندي 5 سنين".

745 جنيه مرتبي الشهري
وزاد سيف شكري: "عدت لمصر وأنا فرحان وفخور جدًا على أساس في دماغي إن في مكافأة ومرتب لي والدنيا هتحلو معايا وهيكون معايا فلوس وشقة وعربية، قالولي طبعًا فيه مرتب وفيه مكافأة، قلت أكيد الخير جاي، سألت على مرتبي كان الرد إنه هيكون 745 جنيها في الشهر بعد خصم الضرائب مكنتش مصدق، قولت مش مشكلة أكيد المكافأة هتعوض سألت عن المكافأتين بتوع بطولتين إفريقيا، قالولي مش هنقدر نصرفلك غير مكافأة الميدالية الذهبية بطولة إفريقيا للشباب وبس، لكن البرونزية لا، كان في دماغي مكافأة عالية ولكني فوجئت أنها 5000 جنيه والمكافأة دي حصلت عليها بعد سنة، أخدت البطولة في مارس 2019 وحصلت على المكافأة شهر مارس 2020 خلال ذهابي لبطولة إفريقيا الثانية".
وأردف في حديثه: اتصدمت بعد ما سمعت الرقم لكن رجعت اتمرنت تاني وتعبت تاني واتصبت تاني، وأبويا صرف عليا تاني وتعب معايا ودفع دم قلبه، وأنا مش عارف أعمل حاجة ولا قادر أساعده، ونفسي احصد ميدالية ذهبية في الأولمبياد ومش عارف من الصعوبة.
وواصل لاعب منتخب المصارعة: "كل ما أرجع بميدالية مفيش راديو حتى بيسجل معايا 5 ثواني أو خبر يتنشر عني، وللأسف الوضع زي ما هو لغاية دلوقتي مش معايا أي حاجة ولا حتى عجلة".
ووجه سيف شكري رسالة للاعبي منتخب المصارعة: زمايلي في المنتخب بحبكم جدًا وقضيت معاكم أحلى وقت حياتي، أتمنى أنكم تحصلوا على الدعم والجهود تتوفر لتستطيعوا حصد ميداليات أكتر لأن في منهم ناس زيي وأحسن مني بكتير وأبطال بجد وحاجة مشرفة جدًا وبشكر كل المدربين اللي تعبوا معايا بشكل كبير.
واختتم لاعب منتخب المصارعة حديثه قائلا: بتأسف لوالدي ووالدتي إني عملت كده وأخدت الخطوة دي من غير ما أقولكم قبلها وبعدت عنكم وإن شاء الله أشوفكم على خير، وكان لازم أخد الخطوة دي عشان كان لازم أشيل عنك يا أبويا.
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الأدبية والفنية والثقافية.