تامر حسني يدعم نجل محمد ثروت: "هفرح معاك قريب"

حرص الفنان تامر حسني على دعم أحمد ثروت نجل المطرب محمد ثروت، الذي أصيب بمرض نادر وسافر لتلقي العلاج بألمانيا

مرض أحمد ثروت النادر
ونشر تامر مقطع فيديو لأحمد ثروت عبر انستجرام وعلق على الفيديو: "أحمد ثروت صديقي وابن الفنان الغالي أوي المطرب الكبير محمد ثروت بمنتهي الحب والرضا والإيمان تقبل محنة كبيرة من ربنا أنه يصاب بمرض نادر يأثر على رجله وميمشيش، وكان بيحضر لزواجه، وفي كلامي معاه قولتله أنا كنت بكلمك أهون عليك والحقيقة لاقيته مش محتاج وهو من إيمانه بقضاء ربنا مهون على نفسه ونفسيته في أعلى درجات الرضا بيهزر ومبسوط، قولتله بأيدك تحول المحنة لمنحة وقالي أنا بعمل كده دلوقتي وفاهم الاختبار كويس وهنجح فيه وهخف وهمشي تاني على رجلي.

وتابع: "فضل يحكي طول المكالمة عن حب أسرته واهتمامهم بيه وإخلاص خطيبته وقد ايه الموقف أظهر معدنها الأصيل وازاي بتسانده وبتسهر على راحته طول الوقت، أنا كمان بشكرهم وبشكرها جدا وبحييها على قلبها وتربيتها الأصيلة".
كما أضاف: "ربنا يشفيك يا أحمد ويفرح قلبك بقدر ثقتك العظيمة في ربنا، الثقة العظيمة اللي أنا شوفتها النهاردة وأفرح معاك في فرحك قريب إن شاء الله، ادعوله معايا يا شباب ربنا يشفيه ويشفي كل مريض".
سفرة أحمد ثروت لألمانيا
وأعلن أحد المقربين من أحمد ثروت نجل الفنان محمد ثروت، أنه سافر ألمانيا، للخضوع إلى عملية جراحية دقيقة بالمُخ، ليتم بعدها التعرف على نوع المرض، ووضع بروتوكول خاص لعلاجه في الفترة المقبلة.

وكتب صديق أحمد ثروت منشورًا، عبر حسابه الشخصي بموقع التواصل الاجتماعي فيس بوك، قال فيه: أحمد ثروت زميل صنعة زي ما بيقولوا، ومن شوية ضغط في الشغل في خلال السنوات اللي فاتت، جات له جلطة في عينه الشمال، والحمد لله بتتحسن ولكن تطور الموضوع أكتر، وجه له مرض في الأعصاب نادر أوي اسمه متلازمة الميلر فيشر، وده مرض بيجي 1٪؜ في المليون، بيخلي الجهاز المناعي يهاجم الجهاز العصبي، وحاليًا مأثر على رجله الشمال تمامًا، واليمين بنسبة 50٪؜ زي ما أحمد قال لي.

وتابع صديق أحمد ثروت: الحمد الله عزيمة أحمد في حتة تانية خالص، وبيهزر وبيضحك ومؤمن ومبسوط أن ربنا اختصه، بس النهاردة يوم مهم جدًا، أحمد سافر لألمانيا، علشان المرض ده محتاج مركز متخصص لعلاجه، والنهاردة هيسحبوا عينة مياه من المخ، علشان يحددوا الموضوع أكتر، ويحطوا بروتوكول للعلاج بإذن الله.

وأختتم صديق ثروت: بناء على نتيجة النهاردة، هيتحدد حاجات كتير أوي، فضلًا وليس أمرًا ندعي لأحمد، لعلكم أقرب إلى الله أنه يشفيه، ويهون عليه ويربط على أبوه الخلوق الجميل، وأمه وأخته وخطيبته.