غراب البين يكتب: الحب مش بالعافية يا شوية بنى آدمين

بعد يوم طويل من اللف والدوران والمرازية فى خلق الله وقفت فوق كشك السجاير بتاع الواد "محروس سبارس" علشان أريح جتتى ساعتين.. إلا أن الحوار الذى دار بينه وبين أحد زبائنه جعلنى أرمى ودانى واستمع رغم أنفى

الزبون بيقول لمحروس أنا نفسى آخد حاجة تتولنى وتخلينى فى الضياع علشان أمسكها وسط الشارع وامسخر أمها
محروس ضاحكا: أنا ممكن ألفلك سيجارة تتولك بس خايف عليك تقتلها وتبقى زى الواد بتاع جامعة المنصورة وتتعدم.. ياعم طالما مش بتحبك يبقى سيبها فى حالها والبنات على قفا من يشيل

الزبون وهو يشد نفس السيجارة: لازم أعلم عليها.. مافيش حاجه اسمها متحبنيش.. الناس كلها عارفه إنى بحبها.. هو انا عيبى إيه يعنى؟.. أنا مش ناقصنى حاجه.. يعنى هو اللى هتحبه هيبقى أحسن منى فى إيه؟
محروس ضاحكا: طب وهى ذنبها إيه إنك بتحبها.. ياخى هى مبتحبكش

وهنا وقفت على قدمى ورفرفت بأجنحتى وأخذت أنعق بأعلى صوتى "قاق قاق" فراح الزبون ومحروس يهشوننى ويقولون لى غور من هنا يا غراب البين جبتلنا النكد والفقر.. فهربت طائرا قبل أن يحدفوننى بالطوب ولسان حالى يقول: بقا أنا اللى جبتلكم النكد والفقر يا شوية بنى آمين؟.. أم أن أفكاركم العقيمة وغروركم هو اللى جايب لكم النكد والفقر

يعنى إيه بنت مش طايقاك وانت عايزها تحبك بالعافية.. هى ذنبها إيه فى كونك شايف نفسك روميو مع إنها مش شايفه فيك غير الفشل؟
يعنى إيه عايز تبهدلها فى الشارع ولا ذنب لها سوى أنك لست فتى أحلامها؟
ويعنى إيه الأخ محروس بيقابل حوار مثل هذا بالضحك والسخرية بدلا من أن ينصحه بكل جديه أن ما سيفعله خطأ فى حق نفسه قبل أن يكون خطأ فى حق الفتاة وفى حق المجتمع

هما الشباب بقوا بيفكروا إزاى اليومين دول؟.. يا ريت تعلموا أولادكم إن الحياة مراحل وإن الفشل فى أى شئ ليس هو آخر المشوار.. علموا أولادكم أن الحب مثله مثل الرزق مش بييجى بالعافية.. الحب مش بالعافية يا شوية بنى آدمين!