غراب البين يكتب: النزاهة فى الغش

بعد يوم طويل من اللف والدوران والمرازية فى خلق الله قلت أريح جتتى فوق سور بلكونة الحاجة سعاد.. فهى دائما خارج شقتها خاصة فى شهور الصيف.. ويادوب عينى هتغمض وإذا بى أسمع صوت الست أم إيهاب وهى بتتخانق مع بتاع الفراخ أسفل العمارة
أم إيهاب تقول للفرارجى انت راجل ماعندكش ضمير وأنا حذرتك اكتر من مرة وقلت لك أن الميزان بتاعك بايظ بينما انت تنكر ذلك.. لو سمحت خد الفرخة بتاعتك ورجعلى فلوسى
الراجل بكل زوق أخد منها الفرخة ورجعلها الفلوس وقال لها أنا عمرى ما أغش فى الميزان يا ست أم إيهاب لكن خدى فلوسك علشان احنا جيران ولا يصح أن يكون بيننا هذا الحوار
بعد ذهاب أم إيهاب نادى الرجل على إبنه وزغده فى صدره قائلا: هو أنا مش قلتلك متلعبش فى الميزان مع الجيران؟.. الورقة دى تحطها فى الميزان للزبائن الغريبة فقط.. خلى عندك ضمير مع الجيران
وهنا وقفت على قدمى ونفشت ريشى وأخذت أنعق بأعلى صوتى "قاق قاق" فراح تاجر الفراخ وإبنه يهشوننى ويقولون لى: غور من هنا يا غراب البين جبتلنا النكد والفقر
فهربت مسرعا قبل أن يحدفوننى بالطوب ولسان حالى يقول: بقا أنا اللى جبتلكم النكد والفقر يا شوية غشاشين؟.. يعنى كمان بتعلم إبنك النزاهة فى الغش؟.. يغش الميزان مع الغريب ويعدل الميزان مع الجيران.. ياااااحلاوة على النزاهة وحسن التربية.. طب بالنسبة للفراخ المريضة او اللى بتحقنوها بالمياه علشان وزنها يتقل.. دى بقا بتبيعوها للاغراب برضو أم للجيران نصيبا منها
يعنى مش كفاية معاناة الناس من غلاء الأسعار يا شوية بنى آدمين؟!.. يعنى كمان بتغشوهم فى الميزان ومش مكسوف من ابنك اللى بتعلمه الغش بكل برود كدا.. ياخى جاتها ستين ألف نيلة اللى عايزة تخلف بنى آدمين زيكم!