غراب البين يكتب: الغشاشين مش مبسوطين

من كام يوم كنت واقف أعلى سور مدرسة الصنايع وذلك أثناء خروج الطلاب من الامتحان.. كان معظمهم مبسوطين وواضح إنهم جاوبوا اللى يقدروا عليه.. إلا أن مجموعة من الطلاب خرجوا لاويين البوز وشكلهم مش مبسوطين فرميت ودانى ناحيتهم علشان أستطلع الأمر

أحدهم يقول: أنا مش همشى من هنا إلا بعد أن يخرج هذا المراقب وأعمل معاه مشكلة علشان يبقى عبرة لغيره وماحدش يعمل معانا كدا فى باقى أيام الإمتحان.. دا مغششناش إلا فى آخر نص ساعة.. يعنى الواحد يادوب يجيب درجة النجاح بالعافية.. دا ماعندوش رحمه أقسم بالله
فقال آخر: خلاص يا شباب كويس إنه سابلنا نص ساعة نغش فيها فبلاش نعمل مشاكل من أول يوم

وهنا وقفت على قدمى ونفشت ريشى وأخذت أنعق بأعلى صوتى "قاق قاق" فراح الطلاب يهشوننى ويقولون لى: غور من هنا يا غراب البين جبتلنا النكد والفقر.. فهربت مسرعا قبل أن يحدفوننى بالطوب ولسان حالى يقول: بقى أنا اللى جبتلكم النكد يا شوية بنى آدمين؟
يعنى مش مكفيكم نص ساعة من الغش وكمان عايزين تضربوا المراقب وتجعلوا منه عبرة؟.. بقا هو دا الجيل الجديد من البنى آدمين اللى احنا هنعيش وسطيهم؟.. ياخى جاتها ستين ألف نيلة اللى عايزه تخلف غشاشين زيكم وكمان مش مبسوطين!