بهية ترى شرعية على باب شقتها فتبادرها شرعية بإلقاء الصباح أملا منها أن تتحسن العلاقات بينهما من جديد شرعية على كم غبائها المعلوماتي والثقافي والسياسي امرأة مصرية يغلب عليها الطيبة والسذاجة لكنها تساق وتسير خلف زوجها كالنعجة لاحول لها ولا قوة. تأتمر بأمره وتنفذ جميع طلباته ولكنها تشعر أنها حين خروجها من اعتصام رابعة تصبح امرأة منبوذة من المجتمع حال معرفة أنها زوجة أحد المعتصمين في ميدان رابعة العدوية وهذا الأمر يؤرقها ويزرع المخاوف في نفسها ويثير كما من التساؤلات عن :هل الإخوان على حق أم على باطل ؟ولاتجد من يجيبها وتترك الإجابة للزمن. أما بهية فهي امرأة مصرية معجونة بالوطنية وحب البلد حب مصر امرأة سافرة غير منفلتة محتشمة تراعي الجيران جميعا وتتودد للأقباط قبل المسلمين تؤمن بأن الدين لله والوطن للجميع تزور أولياء الله السيدة زينب والحسين وأيضا تذهب إلى كنيسة العذراء مريم بالزيتون لاتكره أحدا لكن الأيام الأخيرة بدا عليها كره غير طبيعي للإخوان لما رأت مايفعلونه بمصر جعلها هذا الكره حادة القول والفعل والمزاج. تعاقب شرعية لأنها ترى فيها ولاء بغباء للإخوان وهي ترى أن الإخوان ليسوا على حق وإنما على باطل والدليل على ذلك العام الذي أمسكوا فيه حكم مصر وظهرت فيه مساوئهم وعيوبهم وأحقادهم وغلهم واتضح فشل من رشحوه لحكم مصر جليا بينا لاريب فيه شرعية: صباح الخير يابهية بهية: وحيجي منين الخير وانتم على الصبح وغيار الريق حطيتوا قنبلتين في محطة مترو السادات ذنبهم ايه الناس اللي كانوا حيموتوا لو القنابل دي انفجرت ؟ الناس الغلابة اللي بتطلع الصبح على شغلها مالهاش ذنب في الأمور السياسية اللي بتحصل في البلد ليه عاوزين تقتلوا أبرياء ؟ شرعية: دي إشاعات بهية: دي نازلة على الصفحة الرسمية لجهاز الشرطة والشرطة مابتكدبش شرعية: الشرطة بتكدب انتي ناسية أن الشرطة دي في عهد حبيب العادلي هي اللي فجرت الكنيسة وقالت عناصر إرهابية بهية: حبيب العادلي غير محمد إبراهيم وصوابع إيديكي مش زي بعضها وكل واحد وله غلطاته بس الأمن متواجد بوفرة في محطات المترو علشان يكشف عن المتفجرات اللي أعوانكم عمالين يحطوها للناس الغلابة علشان يرعبوهم ..منكم لله شرعية: خرجوا مرسي وبعد كده كل شىء حيتحل والبلد حتبقي زي الفل بهية: مرسي مين اللي نخرجه ؟ ده بعينكم مرسي لازم يتحاكم على جرايمه وهروبه من سجن وادي النطرون الشعب مش حيقبل أنه يتميز عن مبارك أبدا مهما حصل وحيثور والدنيا حتخرب العدل عدل والعقاب والحساب مافيهوش خيار وفقوس مرسي لازم ياخد جزاؤه وجزاء أعماله وجرايمه . شرعية: كمان خليتوا للراجل الطيب جرايم ؟ بهية: طيب ده إيه إنتي على نياتك كفاية جريمة واحدة بس أنه قبل يرشح نفسه في الانتخابات وهو رجل فاشل ومايعرفش أي حاجة في أساليب الحكم وودى البلد في داهية وخلاها على أعتاب مجاعة وكدب على الشعب في كل حاجة حتي في محصول القمح اللي دوشنا بيه وراح اتصور مع الفلاحين في الغيط وعمل لنا فيلم هندي لازم يتحاسب على كل ده . شرعية: العريان والبلتاجي وحجازي بيقولوا أن مرسي على حق وأن السيسي هو اللي عمل الانقلاب علشان كان طمعان في حكم مصر بهية: طول ما انتم ماشيين ورا العريان والبلتاجي وحجازي حتروحوا ورا الشمس أنا كل يوم باقوم من النوم وانا بحلم أن الجيش قبض عليهم وريحنا من قرفهم دول أندال وكلهم أحقاد . شرعية: دول مسلمين بهية: سبحان الله هو احنا كفرة ياغبية احنا كلنا مسلمين بس هي زناخة ووساخة عقول شرعية: دول ناس متعلمين بهية: مش بالعلام العلام مش كل حاجة دول عقولهم اتمسحت واتعمل لهم غسيل مخ من زمان وحطوا في عقولهم أشياء ومبادئ ومفاهيم مغلوطة شرعية: أنا مش فاهمة كلامك أنا كل اللي فاهماه إنك عاوزة تثبتي لي أنكم أحسن مننا بهية: آه ده اللي عمله حكم الإخوان وسي مرسي بتاعك قسمونا نصين نص إخواني ونص إحنا اللي مش إخوان بقى ده ينفع أن بلد تتقسم نصين الله يلعن مرسي على الإخوان أمال إحنا كنا عايشين قبلكم زي الفل من غير القرف ده مبارك كان مفتري وبيسرقنا بس ماكرهناش في بعض زي ماعمل مرسيكم الأبله ده شرعية: ربنا يهديكي بهية: يهدي مين ياغبية هو أنا مجنونة ؟ ربنا يهديكم أنتم وينور بصيرتكم مع إني أشك في أن ده ممكن يحصل لأن الغشاوة اللي على عيونكم كبيرة أوي شرعية: خلاص خلي الأيام تبين مين اللي على حق ومين اللي على باطل وخلينا إحنا على الحياد مانغلطش في بعض تاني بهية: ماشي أنا ححاول أنسى إنك إخوانية بنت...... شرعية: بنت إيه ؟ بهية: بنت إخواني !
