مواطن.. هسيبها واهاجر ولو رجعت أبقى فاجر

ولاعه والكلام بيتقال في إذاعة.. اسمع مني النشرة الجاية مبنقصدش بيها الإخوانجيه نقصد بيها بس الحرميه.. اللي وكلنها والعه ومعندهمش ضمير.. واللي كانوا مستخبين ساعه ميدان التحرير..
اللي اشتغل في منصب مهم وهو في الأصل بتاع فطير.. اللي مش فاهم أي حاجه في السياسه ده ليه صورة عندي لما كان بمصاصه..
سلام مربع لحكومتي وعلي القرارت اللي بتخدها تعبنا من كلمة اه حكومتي كرهتنا في مصر والحياة.. بصولنا بقي حرام عليكو انتو ليه بتدوسونا تحت رجليكو..
معملناش ثورة عشان تحكمونا وتهينو فينا وتبعترونا عملنا ثورة علشان نتعامل بني آدمين.. نسينا الكلمة دين من آلاف السنين.. أعرف شوية مهندسين على حبه محترمين شغالين قهوجية في شارع عماد الدين.. بقي ده شغل بني آدمين.. اسمعوا مني الكلام مع خالص الاحترام.. هسيبها وههاجر.. وان رجعت قولوا عليا فاجر.. حتي لو طلعت بره اشتغل في المحاجر.
أعيش بره بعمل أحسن معيش في بلدي من غير أمل.. تعبت من كتر الآهات.. نفسي أبقي فارس مش شغال في الأصل سايس.. باكل طول النهار دريس واعيش في وسط عيالي تعيس ومش لاقي مكان ليا في اتوبيس بقي ده شغل بنآدمين.
الكلام ده مش موجه ومش قصدي بيه حد بدل ميتقام عليا الحد.. ويعملوا ليا موضوع ويلفقوا ليا كام قضيه واطلع زعيم عصابة مع إني معرفش أمسك رباباه مع إني عايش في وطن كله ديابه آسف يامصر هنتك يا بنت خالي.
كنت فكرها حرية وال ايه ياخويا ديموقراطية.. ضحكوا عليكم وعليا.. اتريني وانا بنتخب ببيع القضية.. أنا مش مع حد والا فريق والا غيره.. عاوز حد يكون عنده ضمير.. علشان كده ماتوا كتير في التحرير بس ياعيني ماتو على الفاضي وملقوش حتي قاضي ياخد حقهم والا يبكي عليهم والا يروح لأهليهم يواسيهم.. أكبر درس اتعلمته في حياتي متصدقش البني آدمين.