كنباوى وكنباوية.. حلقة رقم (84).. فات الميعاد يا مرسى وبقينا بعاد

كنباوي: بيقولوا مرسي حيقول خطاب يوم الأربع اللي جاي صحيح الكلام ده ؟
كنباوية: يقول، خليه يقول، ماعادتش تفيد قوالته، ما خلاص الفاس وقعت في الرأس وايش ياخد الريح من البلاط مرسي بلاط، بلاط، ماعندهوش حاجة يقولها يمكن طالع يهدد الشعب علشان ما يطلعش مظاهرات يوم 30 أو طالع يستدر عطف الشعب ويقدم تنازلات من تحت الضرس علشان يلم الموقف والليلة أهه أي هرتلة منه والسلام كلام ابن عم حديت لو مرسي راجل بجد يطلع يقول أنا رهن إشارة الشعب وموافق على الانتخابات الرئاسية المبكرة لكن مرسي أجبن من كده مش حيقول كده لأنه مرعوب من أنه يسيب الحكم يتحاكم ويتحاسب زي مبارك علشان كده هو ماسك في الحكم بأديه وسنانه فهمت يا كنباوي ؟
كنباوي: أيوه فهمت بس اللي مش فاهمه هو متوكل على مين على الإخوان على أمريكا ولا على المتأسلمين؟
كنباوية: متوكل على دول كلهم ونسي توكاله على ربنا والشعب وهمه دول اللي كانوا حينقذوه مش أمريكا، كانت نفعت أمريكا مبارك قبل كده
كنباوي: على قولك أمريكا باعت مبارك أول الشعب ما حمر عينه على النظام بكره تبيعه هو كمان ماحدش غالي على أمريكا إلا مصلحتها بس هو مش فاهم كده
كنباوي: خلاص كفاية عليه المرشد خلي المرشد ينفعه
كنباوية: الشاطر والكتاتني أكيد مدبرين حيلة ولعبة جديدة من حيلهم وألاعيبهم
كنباوي: بكره المستخبي يبان بعد خطاب سي مرسي والنية حتظهر وحينكشف المستور
كنباوية: بيقولوا الرئاسة بلغت أبو إسماعيل يبطل كلام وسب وقذف للجيش الأيام دي علشان الأمور تهدي والجيش ما ينقلبش على الإخوان نماردة وشياطين الود ودهم أنهم يطيحوا بالسيسي النهارده قبل بكره ويتخلصوا منه بس صابرين لما هوجة 30 يونيو تعدي وبعد كده أول حاجة حيعملوها حيتدوروا على السيسي لأنه هو الوحيد اللي بيهددهم دلوقتي كان منى عينهم يأخونوا الجيش بس ماقدروش
كنباوي: ما هو ده اللي كان ناقص علشان كانت البلد خربت بجد وماكانلهاش قومة تاني
كنباوية: طول ما الجيش بتاعنا في أمان مصر في أمان
كنباوي: بعد حكم المحكمة يعتبر موقع الرئيس فاضي لأن الرئيس أصبح سوابق ومطلوب للعدالة يعني الشرعية في البلالة حنعمل له حساب ليه بقى
كنباوية: على قولك ده سوابق ونزيل عنبر ونومة برش يعني إيه يبقى رئيس ده كان كبيره كشك سجاير لما طلع من السجن
كنباوي: ماهو افتكر مصر دي كشك والمصريين سجاير قعد يبيع فيها علب وفرط
كنباوية: إيه التشبيهات البليغة دي يا كنباوي
كنباوي: من بعض ماعندكم يا كنباوية
كنباوية: القوى السياسية مش قابلة أي تفاوض مع مرسي وبيقولوا لا بديل عن ترك الحكم مهما قدم مرسي من تنازلات
كنباوي: ليهم حق مرسي اللي وراه تعالب وديابة أي تنازلات دلوقتي حتتسحب بعد هدوء العاصفة وحتتبخر
كنباوية: عندك حق مرسي حيطاطي شوية علشان الريح عالية عليه وبعد كده حيرجع زي ماكان عنيد ومكابر وألعن من الأول وأكتر
كنباوي: ده ماحدش يآمن له تاني غدار ومخادع وملاوع وماكر
كنباوية: الإخوان كلهم مالهمش أمان زي الدنيا والفرامل والنسوان
كنباوي: سيدي يا سيدي على الدرر والحكم والأمثال
كنباوية: ما هة دي الحقيقة النسوان مالهاش أمان
كنباوي: أمال ليه انتي ليكي أمان ؟ هو انتي مش ست ؟
كنباوية: أنا ست بمية راجل متربية على طبلية أبويا وأمي وبنت أصول مش زي نسوان اليومين دول اللي أول ماجوزها يقصر معاها في حاجة تقول له على طول طلقني
كنباوي: عندك حق انتي ست بمية راجل ولا فيه منك ولا زيك ربنا ما يحرمنا منك يا كنباوية
كنباوية: ولا يحرمنا منك يا ساترنا
كنباوي: أنا نويت لو الإخوان غاروا في داهية استر البت كنبة وأكمل لها اللي ناقصها في عفشها وده ندر علىّ يا كنباوية بس هم ينزاحوا
كنباوية: دي البت كنبة لما تعرف اللي انت ناوي تعمله حتفرح أوي
كنباوي: خليها تفرح احنا لينا مين غيرهم هى والواد شلتة ربنا يقدرنا على مصاريف جوازهم
كنباوية: آمين يا رب العالمين
كنباوي: مش حناكل ؟
كنباوية: ودي تيجي أحلي أكل ليك النهارده علشان ندرك الحلو ده