مواطن محروق دمه بيدردش عن "مرسي"

الإسلام.. الإسلام.. الإسلام هو الحل.. الإسلام الصحيح.. الإخوان المسلمين.. السنة.. الشيعة.. صحيح كنت بحلم إني أعيش في أيام زمان.. لكن مش زمان أوي كدا.. لكني حاسس وكأني من الكفار وبسمع عن دين جديد.. طول عمرنا اتعلمنا أن ربنا واحد والنبي هو خاتم المرسلين.. عارفين أنه لا ينطق عن الهوى..علشان كدا قال النبي في حجة الوداع: "اليوم أكملت لكم دينكم وأتممت عليكم نعمتي ورضيت لكم الإسلام دينا".. يعني النبي مقالش فيه حاجة ناقصة في الدين وهايجي حد يكملها.
السؤال الحقيقي.. لو الناس دول مصدقين النبي محمد ليه مش بيعملو بكلامه.. ولما هما مش مصدقينه ليه بيتمسحو فيه؟؟ !!!!
كلنا بنقول أشهد أن لا إله إلا الله وأشهد أن محمد رسول الله.. ليه بنسيب ناس ملهاش لازمة أو عايزة تتكلم باسم دين ربنا جعله خاتم الأديان السماوية وفي الآخر المسلمين هما اللي بيشيلو الليلة.. فيه ناس منهم بدأت تلوم نفسها لأنها مش عارفة تدافع إزاي عن دينها.. أحسن حد يتهمها إنها بتفتي وخلاص.
النهاردة وأنا بلعب على الفيس بوك شوفت حاجة لفتت انتباهي.. لقيت صفحة اسمها "الهيئة الإسلامية في بلاد الشام".. ففرحت أوي أنا بقا... آه والله قولت أخيرا فيه ناس اتجرأت وهيتكلموا بالدين وفي الدين بشكل سليم ويليق بينا ك مسلمين.. وحقيقي فوجئت من روعة الكلام وأدب الحديث.. من شكل ممتع (مقرف وهتعرفوا ليه).. وصور جذابة وجديرة بالاحترام.. (الاحتقار ولامؤخذة).
علشان مطولش عليكم هيدكوا أمثلة من اللي شوفته أول صورة بالصلاة على النبي بتحكي عن الرئيس المبجل "محمد مرسي" التي ظهرت على شجرة في حديق برلين وناس كتير أوي أسلمت بسببها علشان كدا الحكومة في برلين قفلت الجنينة.. يا عين أمكو..
تاني صورة بتتكلم ولا مؤاخذة برضو عن "الكولسون" الإسلامي.
وفيه صورة تانية بتتكلم عن الست اللي ربنا سبحانه وتعالي جالها في المنام وحملت منه.. وبتحلف بالله أن اللي في بطنها مش ابن حرام وبتستشهد ب ستنا مريم.
وآخر صورة شوفتها على الجروب دهب تتكلم أنه قريبا إن شاء الله سيتم إصدار أول نسخة من مجلة "البلاي بوي" لكن بالنسخة الإسلامية.. آه والله بالنسخه الإسلامية.
وفي النهاية مش قادر غير اني اقول، حسبي الله ونعم الوكيل.. أمضاء مواطن محروق دمه....