تعمل إيه لو صحيت ما لقتش النيل.. بيج ستريك:هجري ب"البوكسر"في الشارع..خالد: هدور على 5 جنيهات وقعت مني قبل كده.. مصطفى:هقدم على هجرة لإثيوبيا.. legend:هاخد أصحابي نبلطه ونلعب كورة..أحمد: هاشرب "بيبس"

" تعمل إيه لو صحيت مالقتش النيل" هاشتاج جديد قام النشطاء بتدشينه على تويتر للسخرية من بناء سد النهضة والنقص المتوقع لحصة مصر من مياه النيل، حتى أن النشطاء اقترحوا في حالة عدم وجود مياه النيل أن يقيموا ملعبا مكان مجرى النهر بينما فضل البعض أن يهاجر من مصر.
قال خالد حاتم: "تعمل إيه لو صحيت مالقتش النيل؟ وقع مني 5 جنيهات فيه قبل كده.. هروح أدور عليها".
وقالت هيام سعفان: "تعمل إيه لو صحيت مالقتش النيل هحاكم اللي ضيعه محاكمة تليق بيه... وهرجعه.. النيل حقنا من قديم الأزل ومش هنفرط فيه لو بعمرنا".
وقال عوض أبو شجفة: "تعمل إيه لو صحيت مالقتش النيل؟ هدور تحت السرير وإنت دور معايا هنلاقيه إن شاء الله".
بج ستريك بوس قال: "تعمل إيه لو صحيت مالقتش النيل؟ نهار أسووووود يا جدعان ده لو حصل أنا ممكن أنزل أجري بالبوكسر في الشارع".
ريمون شاكر: "تعمل إيه لو صحيت مالقتش النيل؟.. هطلع أعتصم عند الاتحادية حتى إسقاط الرئيس وعصابته".
وقال legendhappines: "تعمل إيه لو صحيت مالقتش النيل؟ هاخد أصحابي ونبلط مجرى النيل ونعمل ملاعب كورة مكانه".
سامي جمعة: "تعمل إيه لو صحيت مالقتش النيل؟ ولا أي اندهاااش كل حاجة بتختفي دلوقتي.. مشكلتي أغسل وشي إزاي؟!".
وقال خالد صلاح: "تعمل إيه لو صحيت مالقتش النيل؟ هتفرج على كلام الإخوان في البرامج وأشوفهم وهم بيقولوا الكلام ده مش صح ده تضليل إعلامي وتشويه للحاكم هستنى برنامج خميس عشان يقولنا تفسيره الخرافي عن الموضوع".
وقالت نونا العزيز: "تعمل إيه لو صحيت مالقتش النيل؟ هانزل 306 عشان الكابوس ده مايتحققش".
وقال وائل الصغير: "هأجر شقتي اللي على البحر بمليون جنيه".
عمرو جمال على: "تعمل إيه لو صحيت مالقتش النيل؟ هشغل أغنية ماشربتش من نيلها وأعد أعيط".
وقال علي الباسل: "تعمل إيه لو صحيت مالقتش النيل؟ هشغل أغنيه ماشربتش من نيلها وأعد أعيط".
أحمد شكري قال: "تعمل إيه لو صحيت مالقتش النيل؟ الناس مش هتلاقي مكان ترمي فيه زبالة وحيوانات ميتة".
يسرا عزقول قالت: "تعمل إيه لو صحيت مالقتش النيل؟ هادور على مصر في حتة تانية، مصر من غير النيل ماتبقاش مصر بلاش هذي إن شاء الله مافيش سد هايتبني".
وقالت Lumumbaaa: "تعمل إيه لو صحيت مالقتش النيل بلدي يا بلدي وأنا نفسي أروح بلدي... مرة نمت فيها وصحيت ملقتش بلدي...وأنا نفسي أمووت في بلدي".
وقال مصطفي المصري: "تعمل إيه لو صحيت مالقتش النيل؟ هقدم على هجرة لإثيوبيا".
وقالت هبة الجندي: "تعمل إيه لو صحيت مالقتش النيل؟ مش فارقة أنا كدا كدا كنت ناوي أهاجر من يوم ما مرسي مسكها وعلى رأي المثل الله جاب الله خد الله عليه العوض".
وقال هشام الدالي: "تعمل إيه لو صحيت مالقتش النيل؟ هقف أتفرج مع الناس اللي واقفة تتفرج وأضرب كف ع كف وأقول الله يخربيتك يا مرسي".
وقال أحمد عبقر: "تعمل إيه لو صحيت مالقتش النيل؟ هقف أتفرج مع الناس اللي واقفة تتفرج وأضرب كف ع كف وأقول الله يخربيتك يا مرسي".
وقال أحمد الفقي: "تعمل إيه لو صحيت مالقتش النيل؟ هاشرب بيبس".
مصطفى عبد الحليم قال: "تعمل إيه لو صحيت مالقتش النيل؟ هصطاد سمك بإيدي ومن غير سنارة".