إسماعيل ياسين في بطولة الأمم الأفريقية: "اطمن انت مش لوحدك"

إننى في منتهى الانبهار، عقلى سيتوقف عن العمل، قال إيه ياخويا العيال بتوع "الإخوان" عايزين يبوظوا البطولة، آه والنبى زي مابقولكم كده.. ومعتز مطر هايج على قناة الشرق، وبيهيج الناس علشان تنزل تشجع المنتخب بالصفافير وغطيان الحلل، وبينصحهم إنهم ماينسوش ينفخوا البلالين، يا سلام عالذوق، يا سلام عالحنية، إلهى تجيلك طوبة في دماغك تنفخها زى الكورة الكّفّر يادى الجدع.. بس ياريت تفرقع بعيدا عن وجهى يا أيها المشعللاتى عديم الأهلية والكينونية.
آه يانى يا شلاضيمى يانى يا مااااامي.. ده أنا دماغى هتدشدش على ستين ألف حتة، ولا أدرى ماذا أفعل وكيف أعي ما أسمع.. قال إيه ياخويا قاعد طوال الأسبوع اللى فات يدعو الناس للغضب، ويدعوهم للانتفاض يوم الأربعاء.. ويحلف لهم إنهم مش لوحدهم.. وكل شوية يرفع شعار "اطمن انت مش لوحدك".
وآدى الأربعاء راح، ووراه الخميس والجمعة والسبت، ودخلنا في الأسبوع التانى ولم نر غضبا ولا انتفاضة ولا دياولو.. وكل واحد منهم اتفاجئ بأنه لوحده.. طب يكونش غضب الإخوان بيبقى داخلى ولا يُرى بالعين المجردة؟!.. إنه جائز ويجوز وآه يانى ياجوزائى يانى يابا.
طب يعنى شعار "اطمن انت مش لوحدك" هيفضل برضه حتى آخر البطولة أم إنكم ناويين تبيعوا الشباب وهتسيبوهم من أول ماتش حيرانين ومش عارفين يستخبوا فين بغطيان الحلل والبلالين والصفافير!!
شباب مصر أكثر وعيا من الانسياق لهذه الدعوات.. خاصة إذا كان لدينا حدث عالمي مثل بطولة الأمم الأفريقية.. حدث يمس سمعتنا جميعا كبيرا وصغيرا غنيا وفقيرا مواطنا أو مسئولا.. حدث يشهده العالم أجمع.
هذا عن شبابنا.. أما عن شباب ودراويش الإخوان فهم أعلم بك ولن يطمئنوا أبدا إلى أنهم مش لوحدهم، لأنهم في كل مرة يجدون أنفسهم لوحدهم.. ولأنك أنت ومحمد ناصر وهشام عبد الله وغيركم من المشعللاتية توجدون هناك، حيث تنعمون بما لذ وطاب على موائد أسيادكم الذين يؤونكم في تركيا وقطر.. وسأكتفى بهذا الذي قالته لكم شلاضيم بُقى ولن أقول لكم مجددا سوى.. سلامو عليكووووووووووووووو