"جروس ولاسارتى".. مين قاعد ومين ماشى

"حادي بادي كرنب زبادي.. شالوا وحطوا كله على دي.. يا شوبير روح الدير.. وقولى مين راح يمشى المرة دى".
مع إن الموضوع مش محتاج نلعب حادى بادى ولا محتاج تحليلات شوبير ولا حتى خالد الغندور.. لأن حسم بطولة الدوري بدرى بدرى هو اللى هيكون الفيل بين بقاء أو رحيل مدربى الأهلي والزمالك.. فالأخ لاسارتى واقف للخطيب في الزور والأخ جروس واقف لمرتضى منصور في الحلقوم.
سيبك من مدرب نادي بيراميدز علشان أنا وإنت ومجلس إدارة بيراميدز عارفين والمدرب ذات نفسه عارف إنه بينفخ في قربة مقطوعة ونصيبه معروف مسبقا وهو المركز الثالث.
فخلينا في مدربى الأهلي والزمالك عمنا جروس وأخونا لاسارتى اللى عندهم أفضل لاعيبة في مصر ورغم ذلك مش قادرين يهزموا فرقة ناشئة زى بيراميدز.. ودى حاجة مجننة مجلس إدارة الأهلي وملخلخة مجلس إدارة الزمالك حتى لو أظهر إن بيراميدز صديق العائلة وضرب الحبيب زى أكل الزبيب.
لكن الخلاصة هي إن عدم حصول الزمالك على الكونفدرالية هيكون آخر يوم لأخونا جروس في الزمالك حتى لو حصل على الدوري المصرى.. أما لاسارتى فالأهلي عاصر على نفسه ليمونة ومستحمله لنهاية الدوري سواء حصل عليه أو لم يحصل فهو ماشى ماشى.. فالمدربان الاثنان لا ريحة لهم ولا طعم ولا حتى ستايل وأقل مدرب مصرى أفضل من الاتنين.