أمير طعيمة: ما بكرهش في حياتى أد الأهلي وندمان على «نادي المبادئ»

عبر الشاعر أمير طعيمة عن استيائه الشديد من جمهور النادي الأهلي بسبب تعليقاتهم على منشوراته عبر حسابه الشخصى بموقع التواصل الاجتماعى «فيس بوك».
وكتب طعيمة عبر حسابه الشخصى «الناس كلهم عارفين إني مش أهلاوي ولا زملكاوي، وأن احترامي للأهلي ككيان كان كبيرا، وعشان تفهموا اللي هقوله كويس لازم تدخلوا على صفحتي الرسمية وتشوفوا تعليقات جمهور الأهلي المحترم على آخر بوست رغم أنه بوست فني».
وأضاف «المختصر المفيد أنا حاليا ما بكرهش في حياتي قد الأهلي طالما ده جمهوره، هتقولي قلة؟ هقولك رغم إنه مفيش تعليق واحد يتوصف بالاحترام لا على فيس بوك ولا تويتر، بس حتى لو قلة يغوروا بناديهم».
وأوضح «أعلن ندمي واعتذاري لنفسي عن أغنية نادي المبادئ اللي أهديتها للخطيب في حملته الانتخابية».
واختتم طعيمة: «كلامي واضح أنا قلت إن الأهلي بقى أكتر حاجة بكرهها في حياتي وما قلتش إني بكره وهكره كل شخص بيشجع الأهلي، أكيد أنا مش مجنون وفيه مقربين مني أهلاوية وأكيد محترمين».