عاجل : مجلس إدارة الأهلى يتخذ قراراً حاسما ً بعد تطاول أمير طعيمة على "جماهير النادى "

قالت مصادر إن مجلس إدارة الأهلى قرر حذف أغنية نادئ المبادئ الذى ألفها الشاعر أمير طعيمة أثناء حملة محمود الخطيب الانتخابية لرئاسة الاهلى من جميع الوسائل الإعلامية للنادى و صفحات السوشيال ميديا الخاصة به و قرر منع التعامل مع طعيمة فى المستقبل و ذلك بسبب هجومه على الجماهير .
من جانبها هاجم جمهور الاهلى طعيمة ووصفه بأن هجومه جاء دفاعا عن ترك ال الشيخ
و هاجم الشاعر أمير طعيمة جمهور الأهلى هجوما عنيفا و كتب على صفحته الشخصية بفيس بوك :"الناس كلهم عارفين اني مش اهلاوي و لا زملكاوي و ان كان احترامي للاهلي ككيان احترام كبير، وعشان تفهموا اللي هقوله كويس لازم تدخلوا علي صفحتي الرسمية و تشوفوا تعليقات جمهور الاهلي المحترم علي اخر بوست رغم انه بوست فني، المختصر المفيد انا حاليا ما بكرهش في حياتي قد الاهلي طالما ده جمهوره، هتقولي قلة ؟ هقولك رغم ان مفيش تعليق واحد يتوصف بالاحترام لا علي فيس بوك و لا تويتر، بس حتي لو قلة يغوروا بناديهم، حاجة في منتهي القذارة".
وتابع :" بعلن ندمي و اعتذاري لنفسي علي اغنية نادي المبادئ اللي أهديتها للخطيب في حملته الانتخابية. اللي مش عاجبه الكلمتين دول يخرج من عندي عشان ما اخسرش حد علي موضوع تافه".
وواصل :"انا عمري ما اتكلمت عن الاهلي او غيره بعدم احترام، بس طبعا ده كان ياما كان".
وتابع :"كلامي واضح انا قلت ان الاهلي بقي اكتر حاجة بكرهها في حياتي و ما قلتش اني بكره و هكره كل شخص بيشجع الاهلي، اكيد انا مش مجنون و فيه مقربين مني أهلاوية و اكيد محترمين.
"مفيش حاجة اسمها شخصية عامة فلازم يعمل كذا و كذا، فيه حاجة اسمها بشر زيه زيك، لو خالف القانون هيتعاقب زيك، لو حد غلط فيه هيتجرح زيك، و لما هيموت هيتدفن في تربة زيك مش هيتدفن علي سحابة في السما".
"فسيبكم بقي من جملة انت شخصية عامة فلازم تبقي صخرة او تلبس بدلة حديد او تحول أحاسيسك لموجات صوتية ما يسمعش ترددها غيرك، اللي للمجتمع عند أي شخصية عامة انه يلتزم بالتقاليد و الاصول و يحترم نفسه و الآخرين، غير كده هو شخص من لحم و دم".
وأتم :"من هنا و رايح انا هقول اللي يريحني انا طالما عايز اقوله، مش مطلوب مني اكتم في نفسي كلام عايز اقوله و يجيلي ذبحة عشان انا شخصية عامة و كلام فاضي."