امير طعيمة يدافع عن دنيا سمير غانم

بعد النجاح الذي حققته أغنية "واحدة تانية خالص" للفنانة دنيا سمير غانم وتخطيها حاجز المليون مشاهدة ، إلا أن هناك انتقادات هاجمت الاغنية.
واتهم البعض صناع الأغنية أن هناك دعوة لإلغاء شخصية المرأة من خلال خنوعها لأوامر الرجل ، إلي أن قرر مؤلف الأغنية الشاعر أمير طعيمة توضيح الأمور للجمهور في بيان قال فيه:
"لما صديقتي الجميلة و الفنانة متعددة المواهب دنيا سمير غانم قررت انها تعمل ألبوم، كل فريق العمل فكر إيه الفورمات اللي ممكن دنيا تظهر بيه عشان تبقي مختلفة , و عشان تظهر بشكل يليق بيها خاصة انها بتعمل الألبوم ده بعد ما بقت من أهم و أفضل الممثلات في مصر، و بعد تفكير شهور و تجربة العديد من الأشكال توصلنا إن أفضل حل إن دنيا تغني في موضوعات بتهم بنات جيلها و بالأخص السن اللي هي فيه ,
و بعد نزول أول أغاني الألبوم واحدة تانية خالص حصل حالة من الجدل الايجابي من وجهة نظري حول الأغنية، و أنا هنا عايز أشكر كل اللي قالوا رأي إيجابي و وصلتهم الأغنية بالشكل اللي إحنا قاصدينه و عشان أنا بحترم الرأي المخالف و بيهمني جدا عايز أوضح بعض النقاط :
فكرة إن الأغنية ضد حقوق المرأة و بتهين البنت و تلغي شخصيتها ده كلام - مع احترامي ليه - مش حقيقي، أولا: أنا ككاتب للأغنية تم تكريمي من الأمم المتحدة للمرأة بعد أغنية نص الدنيا للفنانة الكبيرة و العظيمة أنغام لاهتمامي بحقوق المرأة، ثانيا نفس فريق العمل قدم في رمضان أغنية بنت صعيدية و اللي الأمم المتحدة للمرأة أشادوا بها كاستمرار لوجود صوت يدافع عن حقوق المرأة.
ثانيا فيما يخص الأغنية نفسها: أي بنت و ولد في بداية علاقة حب حقيقية بيمروا بالتفاصيل اللي اتكلمنا عليها في الاغنية، يعني ممكن الولد يعلق علي لبسها من باب الغيرة و إحترامه ليها و لنفسه فنبتدي نشوف الجوب القصيرة طولت شوية و حاجات زي كده، ممكن يقلق من بعض صاحباتها اللي بيشوف انهم ممكن يكونوا سبب لمشاكل ملهاش داعي، بيعلق أكيد برضه علي مواعيد رجوعها للبيت أو بعض الولاد اللي بتعتبرهم اخواتها و هو حاسس ان ممكن يكونوا مش محل ثقة و كل التفاصيل دي، معظم البنات بيبقوا سعداء بكده علي الاقل في بداية العلاقة و بتحاول ترضيه طول ما طلباته منطقية، و طبيعي جدا ان حياة البنت بتتغير بعد دخول شخص في حياتها و أكيد برضه الولد (بس الاغنية دي معمولة علي لسان بنت في بداية العلاقة).
وارد جدا ان بعض البنات اللي ما دخلوش في علاقة عاطفية يحسوا ان الاغنية دي بتظلم البنات و لكن أول ما هيدخلوا في علاقة حب حقيقية هيستمتعوا بغيرة حبيبهم عليهم طالما في حدود المعقول و بمرور الوقت بتبقي علاقة طبيعية متوازنة في الحقوق و الواجبات، و اذا كان الولد بيفرض رأيه بدون منطق العلاقة بتنتهي بسرعة، احنا مش قصدنا خالص ان من حق الولد انه يتعسف مع البنت أو يبقي سي السيد و مفيش حاجة في الاغنية بتقول كده، دي أغنية موقف بتتكلم عن حدث معين في وقت معين و مش بنتكلم عن موقف في كوكب تاني، دي حالة موجودة زي ما فيه حالات تانية في الألبوم هتأكد علي الكلام ده و هتلاقي نفس البنت بتتمسك بحقوقها و بتبقي في منتهي القوة.
مجرد اهتمامنا بمواقف و حالات بتمر بيها البنت و أخدنا المخاطرة بعمل ألبوم كامل يعبر عن مواقف بتمر بيها البنات ده دليل علي احترامنا للمرأة بصفة عامة و للبنات اللي في السن ده بصفة خاصة".
أغنية واحدة تانيه خالص هي الأغنية الرئيسية في ألبوم الفنانة دنيا سمير غانم الجديد، والاغنية من كلمات أمير طعيمة وألحان وتوزيع مادي ومن إنتاج شركة روزناما ريكوردز وسوف يتم اصدار الألبوم خلال شهر سبتمبر الحالي وهو يضم 12 أغنية وتم اعداد وتجهيز الألبوم في عامين كاملين.