أمير طعيمة لزوجة مدحت صالح : ماتتكلميش على أخلاقى وخللى الطابق مستور وإنتى فهمانى كويس

تلقى الشاعر أمير طعيمة رسالة من الشاعرة نورا الباز زوجة المطرب مدحت صالح تتهمه بسرقة أغنية "نفسى اعرف ليه" التى طرحتها النجمة شيرين عبدالوهاب ضمن ألبومها الآخير "إسأل عليا" وأضافت أنها لم ترسلها لشيرين ولكنها أرسلتها لزوجها الموزع محمد مصطفى كما أرسلتها أيضا للمطرب فضل شاكر الذى أعجب بها للغاية.
بينما جاء رد طعيمة على تلك الرسالة عبر صفحته الخاصة على موقع التواصل الإجتماعى الفيس بوك "و ده ردي أنا "أمير طعيمة" ...أنا مش متعود أرد علي التفاهات دي بس برضه عشان واجبي أوضح للناس مثل هذه الأمور .. نورا الباز أنا ما أعرفلكيش أغاني أساسا و كل اللي أعرفه إنك زوجة الفنان المحترم مدحت صالح .. أنا اسمي أمير طعيمة و بكتب من سنة ???? (يعني من أيام ما كنتي بتقولي ع السكر أكر) و قدمت ما يزيد عن ??? أغنية و من ?? سنين قدمت مع زوجك الفنان مدحت صالح أغنية من أشهر أغانيه إسمها "جاي علي نفسك ليه" و ده اللي هيخليني احاول التزم الاحترام معاكي رغم انك ما تستاهليش ده مني ..
أولا انا أخر مرة إشتغلت مع الموزع محمد مصطفي كان في ألبوم أيام حياتي لسميرة سعيد من سنوات عديدة يعني أكيد ما سمعتش أغنيتك المزعومة عنده، تاني حاجة أحمد محيي ما أشتغلتش معاه غير أغنية واحدة لراغب علامة إسمها "خدت بالي" و الأغنية دي متسجلة من ? او ? سنين و نزلت من سنتين تقريبا و ما شفتش محيي من ساعتها و محيي موجود و ممكن تسأليه .. أما فضل شاكر فآخر أغنية اشتغلتها معاه كانت "الدور علي مين" و دي من ? او ? سنين .. و بغض النظر عن كل ده إيه اللي هيخلي واحد زيي يسرق منك اغنية أساسا و يعمل القص و اللزق اللي انتي بتتكلمي عليه ده .. ده علي أساس إني ما عنديش أفكار و بتتبع موهبة خارقة زيك عشان أعمل أغنية .. الاغنية دي انا عملتها مع خالد عز و اللي إداها لشيرين سعيد إمام و بعد كده محمد مصطفي ابتدي يوزعها.
أنا ممكن أرفع دعوي قضائية عليكي و طبعا هكسبها عشان إنتي بتقولي كلام فاضي عشان تشهري نفسك رغم إن الشهرة الأفضل إنك تعملي أغاني حلوة و تنجحي بس أنا إحتراما لمدحت هديكي فرصة أخيرة تحترمي فيها نفسك و ترجعي لربنا و تتقيه و تبطلي الحقد اللي جواكي و إتهام الناس المحترمين، أنا ما شفتكيش إنتي شخصيا غير من ? سنين عند مطرب صديق و ما تتكلميش على أخلاقي و خلي الطابق مستور وإانتي فهماني كويس.. (عجبتني من الرسالة كلها إنك "إتعودتي تدي ضهرك لمثل هذه الاشياء"). بس إبقي خدي بالك عشان الدنيا برد اليومين دول.