كلمات قالها رامز أمير، الشهير بمازن حاليًا، بسبب دوره فى مسلسل حالة عشق. رامز من أكثر الممثلين اللي لفتوا الانتباه خلال الأيام اللي فاتت لموهبته الرائعة وإحساسه الصادق فى التمثيل بإشادة الجمهور. رامز مواليد 1 ديسمبر 1988، برج القوس. ممكن يتوصف بأنه من أكثر الناس تواضعًا واحترامًا، بس شخصية رامز اللي بتظهر فى التليفزيون تختلف عن شخصيته فى الواقع تمامًا.. تعالوا نعيش مع رامز شوية بعيدا عن حياته الفنية.. ■ كلمنا أكتر عن يومك بتقضيه إزاى وفين؟ - أنا منظم شوية فى الموضوع ده مقسم جزء لنفسى وجزء للشغل.. غير الشغل لازم أروح الجيم وأروح أركب خيل وبعدين بريح ساعتين فى البيت وبعدين ساعتين بيكون ليهم علاقة بالشغل. ■ ليك مثل أعلى ولاّ لأ؟ - مش موضوع مثل أعلى على قد ما هو إنى أستفيد على قد ما أقدر من كل شخص أقف قدامه أيا كان الأساس بيكون فى تراكم الخبرات. ■ إيه حكايتك مع الإعلانات؟ - مرحلة مهمة جدا فى حياتى، يعنى.. بدايتى فى الأول كانت عن طريق الإعلانات بالصدفة وأنا فى 3 ثانوى وبعديها بدأ المخرجون يعلقون عليا وعلى شخصيتى وشافوا إنى موهوب، بدأت أحب الموضوع أكتر وأستمتع بيه جدا، بعدين قررت أدرس فى معهد الفنون المسرحية. ■ لو مكنتش ممثل كنت تحب تطلع إيه؟ - كان نفسى زمان أكون طيار، ولحد دلوقتى تقريبا. ■ هواياتك! - باحب الرياضة وركوب الخيل والغطس. ■ المكان اللى بتروحله لما الدنيا بتقفل فى وشك وبتكون متضايق! - هما مكانين.. القريب اللى أقدر اروحه بسهولة.. مكان فى الصحراء جمب الاسطبل بتاعى باطلع فيه بالعربية وباقعد هناك أسمع مزيكا بعدين برجع. المكان التانى.. بغطس بس دا مش بعرف أعمله على طول لازم سفر. ■ بتخاف من إيه..! - مابخافش من حاجة، كان زمان بخاف من المرتفعات بس بدأت أنط من أماكن عالية كتير لحد ما راحت. ■ إيه الصفات اللى بتكرهها فى أى شخص واللى بتحبها؟! - أكره الشخص الكداب جدا وباحب الشخص الحنين. ■ إيه المبدأ اللى إنت ماشى بيه؟ - اللى عايز حاجة بيعملها. ■ الشغل مريح أكتر مع الشباب اللي فى سنك ولّا مع الأعمار البعيدة عنك؟ - بالنسبالى الشغل مع الشباب بيكون متعة أكتر عشان بيكون فيه تقارب فى طريقة التفكير والتعامل. أما الكبار فهما بالتأكيد بيكونوا خبرة أكتر. ■ مين من الممثلين الشباب اللى شايف ليهم مستقبل فى المجال دا؟ - فى شباب كتير منهم محمد عادل، حسن الرداد، وايتن عامر، من الناس اللى عارفة تثبت نفسها. ■ إيه أكتر موقف كوميدى اتعرضت ليه؟ - موقف الناس لما بوست إيد مى فى المسلسل، العلاقة الحلوة اللى بين أفراد العمل بتطلع المشاهد بجد وزى ما تكون حقيقة بالظبط فبتوصل للجمهور بسرعة. ■ شعورك كان إيه بعد ما شوفت ردود فعل الشباب والبنات على البوسة دي؟ - كنت مبسوط جدا بردود الأفعال على دورى فى المسلسل عامة لأنى حسيت إنى فيه بينى وبين فريق العمل كيميا تمثيلية قوية، وبالنسبة للبوسة فدى بوسة أخوية عادى يعنى، هدفها إضحاك المشاهد. ■ نوع المزيكا اللى مابتحبش تسمعه؟ - Metal مفيش نوع معين، بحب أسمع كله. ■ قولنا حاجة مش كتير يعرفوها عنك! - شكلى وستايلى بيخلوا الناس تفتكر انى بتاع بنات ودى مشكلة بقابلها كتير على الرغم إنى مش كدة خالص، أنا حياتى كلها شغل ورياضة مش أكتر. ■ الحب والارتباط فى حياتك؟ - ما قولنا مفيش الكلام ده على الأقل لحد دلوقتي. ■ لو هتمثل فيلم قديم تختار إيه؟ - أختار الناصر صلاح الدين، بحب الحاجات التاريخية، ولو كوميدى هختار أفلام اسماعيل ياسين. ■ بتحب تقرأ إيه؟ - مش باحب اقرا قوى بس بحب الأفلام جدا. ■ إيه أكتر أفلام بتحبها؟ 1- Titanic -2 A Walk to Remember 3- Hancock 4- If only 5- Seven Pounds ■ بتشرك حد فى قراراتك؟ - فى حالة لو متردد بس غير كده لا، وصعب أغير رأيى بحاجة مقتنع بيها. ■ فيه قرار ندمت عليه! - لا خالص مفيش ندم عشان الواحد بيتعلم من كل حاجة بيمر بيها. ■ اوصف نفسك ب 3 كلمات! - عنيد باحقق اللى انا عايزة ومجنون. ■ لو شغال فى فيلم وشوفت حد جديد موهوب ممكن ترشحه يشتغل معاك؟ - لو المنتج وافق ف أكيد آه طبعا دا شىء كويس عشان الجمهور بقى عطشان لناس جديدة. ■ كنت متوقع نسألك عن إيه ومش سألناه ليك؟ - إيه الجديد عندى، وفى شخصية المسلسل الجديد.
