«فيس بوك» بيريح ضميرنا

لو مكسل تعزم أصحابك على فرحك، «فيس بوك» ممكن يحل المشكلة عن طريق تطبيق إيفنت ممكن تعزم فيه كل أصحابك، حتى حالات الوفاة أصبح من الممكن تقديم واجب العزاء عبر موقع التواصل الاجتماعى، صفحة المجلس الأعلى للألش رصدت أهم الاستخدامات المبتكرة للموقع، وقال أبو نِسمة الأسطورة فى بوست حاز إعجاب الآلاف: من أهم أهم أسباب انتشار الفيس بوك فى مصر.. فكرة أنه بيريح ضميرنا بشكل مرضى جدا..
1- يعنى مثلا بدل ما تقوم تصلى.. كفاية إنك تعمل شاير لصورة ضفدع على كتفه لفظ الجلالة..
2- هذاكر ساعة وأقعد ع الفيس ساعة.. مين فينا مقالش الكلمة دى وقعد ع الفيس 5 ساعات وريح ضميره وذاكر ربع ساعة..
3- مش لازم أتصل بيك وأسأل عليك.. شات ممكن يلخص الحدوتة.. ولو عايز أسيط لك يبقى واال ع البروفايل..
4- الفيس كمان بيقوم بدور الخاطبة والقوادة فى نفس ذات الوقت..
5- وأهم أهم ميزة فى نقطة إرضاء الضمير دى الجمايل والواجب بالحجة والمنطق..
-مبتسألش ليه؟..
- لا يا كبير مانا كلمتك ع الفيس من أسبوعين ومردتش.
-معلش كان فرحى، مانا بعتلك أيفينت الفرح ع الفيس مجتش ليه؟..
باختصار الفيس قدر وبعبقرية أنه يريح دماغك وضميرك.. بشوية حروف يخليك تعمل الواجب اللى من 30 سنة كنت هتسافر له من إسكندرية لأسيوط علشان تقول البقية فى حياتك يا أحمد اللى ماخدتش فى إيدك ع الفيس 30 ثانية..