احنا بتوع الفيس بوك

بما أن توجهات الحكومة، وكما يردد البعض ترجح وجود نية لمراقبة الفيس بوك وإجراء ملاحقات للناشطين عليه، فإنه من المتوقع أن يتم القبض على كل من يتكلم بحرية على هذا الموقع الاجتماعى الكبير، وفى الوقت ده سيتم وضع المقبوض عليهم فى أقفاص الاتهام مع باقى المسجونين، وسيتم ترحيلهم للتحقيق مع مرتكبى الجرائم الأخرى.. وسينادى الشباب بأعلى صوتهم احنا بتوع الفيس بوك حرام عليكم.. وعند التحقيق معهم ستكون جرائمهم متعدة وكثيرة، وفقاً لتطبيقات الفيس بوك وخدماته المختلفة.. فسنجد تهمة لشاب عمل جروب للتغيير.. وآخر عمل "بيج" ضد مسئول مهم.. وآخر عمل"ايفنت" لمظاهرة.. وغيره عمل "شير" لصورة تعذيب.. وواحد عمل "ليك" على جملة فيها اعتراض.. وممكن واحد منهم ملهوش ذنب كان معملوله تاج على" نوت" أو فيديو معارض، ويفضل ينادى أنا مليش ذنب، أنا واحد معرفوش عملى "تاج "يا جماعة.. والضابط يرد عليه هيه التاج بس يا ابنى، انت عضو فى تنظيم فسيبوكى، وعندك "فرندز" أعضاء فى جروبات معارضة وبتدعوا للتظاهر الإلكترونى ومش عاجبكم البلد، وبعدين لقينا عندك رسايل فى "الانبوكس" بتاعك جايه من جروب التغيير.. وواحد تانى عنده "انفيتيشن" من صفحات شخصيات معارضة، وبيقول أنا مليش دعوة بيهم، وأنا معملتش "كونفيرم" والله.. وواحد تالت كان عامل شات على الفيس بوك ومش عاجبه أسعار الطماطم واللحمة، والضابط يرد عليهم كلكم حاجة واحدة، طالما أنتم على الفيس بوك عاوزين الدمار والخراب للبلد على رأى "مصر النهارده".. منه لله اللى عمل الفيس بوك، بوظ أخلاقكم وخلاكم تتكلموا عن البلد كده قدام اللى يسوا واللى ميسواش.. ولا تزال التحقيقات مستمرة بحثاً عن عقوبة مناسبة.