المرور: 11 خطوة لتجنب الحوادث والمخالفات أعلى الطرق

تقوم الإدارة العامة للمرور، بدورها في الحد من حوادث الطرق بتكثيف التواجد المستمر ودعم خدماتها على كافة المحاور والطرق الرئيسية.
وبمناسبة الاحتفال بعيد الشرطة، أصدرت إدارة المرور مجموعة من الإرشادات تحت عنوان (أمنك على الطريق في سطور)، أبرزها:
1- "وانت سايق" (احتفظ بمسافة مناسبة بينك وبين اللي قدامك "4 أمتار لكل 10 كم سرعة"، وخد بالك أنه 30% من الحوادث بسبب عدم ترك مسافة الأمان.
2- " وانت سايق" (اجعل استخدامك للهاتف المحمول للضرورة) وخد بالك أنه نسبة كبيرة من الحوادث سببها استخدام الهاتف المحمول.
3- لما تلاقي عربية طوارئ (إسعاف شرطة أو مطافئ)"وانت سايق" وسع لها الطريق وخد بالك انها رايحة تنقذ مصاب أو تطفي حريق.
4- خد بالك "أنه السير بدون لوحات معدنية "مخالفة جسيمة" تضعك تحت طائلة القانون.
5- وانت سايق داخل المدينة متستخدمش الأنوار العالية وخد بالك (أنه ده بيمنع قائد السيارة في الاتجاه المعاكس من الرؤية تمامًا لمدة 7 ثوان).
6- خد بالك أن إجراء الصيانات الدورية لعربيتك (هيحميك من حدوث أعطال مفاجئة، تكلفة تصليحها بيبقى أضعاف تكلفة الصيانة الدورية، ده غير أنك بتعطل الطريق).
7- خد بالك (لازم تظبط وضع المرايات الجانبية قبل ما تتحرك).
8- انت سايق.. لو عاوز تتخطى العربية اللي قدامك، اتأكد أنه شمالك فاضي وخد بالك انه التجاوز الخاطئ سبب أساسي في حوادث كثير.
9- وانت سايق استخدم الإشارات الضوئية الجانبية قبل ما تدخل بالعربية يمين أو شمال (وخد بالك أنه ده لازم يبقى بوقت كافي لتنبيه العربية اللي وراك).
10- خد بالك وانت سايق في أوقات "سوء الأحوال الجوية" (هدئ السرعة – حافظ على التهوية داخل العربية عشان الشبورة- اتأكد من كفاءة مساحة الزجاج استخدام أضواء العربية للتنبيه وقت الضباب).
11- وانت سايق اتأكد دايمًا من ضبط مستوى الهواء داخل إطارات السيارة.. وخد بالك أنه الإطار الاحتياطي لازم يبقى جاهز لأي عُطل مفاجئ.