بالفيديو.. شاهد دليل الدكتور أبو حفيظة للسواقة في مصر بدون ألم

قال الإعلامي أكرم حسني، الشهير بسيد أبو حفيظة، مقدم برنامج "أسعد الله مسائكم من جديد"، عبر فضائية MBC مصر، أنه قديمًا كان يقود سيارة 132 سماوي، قائلًا: من لم يركبها لم يركب عربيات، معرفش يعني إيه تعطل منك على كوبري أكتوبر في عزْ الحر، وتعمل حادثة وش لوش مع ميكروباص، ودلوقتي راكنها تحت البيت، زي أي مُسنْ.
ثم كشف عن دليل الدكتور أبو حفيظة للسواقة في مصر بدون ألم، إنك تعرف تسوق في البلد دي يبقى عندك موهبة وقوة خارقة..
فسرد قائلًا: الشمال في السواقة مختلفة عن أي شيء في مصر والشمال الوحيد اللي شغال في السواقة، لما يكون في خطْ في منتصف الطريق ياتمشي يمينه أو شماله إنت مش لاعب ترابزين في السيرك القومي، مفيش عليك أي حرج في الشتيمة وإنت سايق، لازم تبقى فاهم لو خبطت حد من وراه تبقى غلطان ولو خبطك من ورا تبقى غلطان بردوا.
وأضاف، لو لقيت يافطة حكومية، مكتوب عليها منطقة حواث ياريت نلتزم ونمشي فيها، إعمل حسابك في بدلة وكرافتة وارد تتزنق في زفة وتوصل للقاعة، لدينا مشكلة مع الميكروباصات والتوكتوك وحاليًا توجد التمناية، ياريت تبعدوا عنها هي نتاج تزاوج بين الميكروباص والتوكتوك، مش لازم تاخد بالك من العربيات اللي حواليك بس هتلاقي أسرة مصرية بيعدوا الشارع وهما بيضحكوا.
وعن عطل العربية قال، لو عربيتك عطلت وإنت ولد هتلاقي رقم ونش طواريء كلمهم، لو إنتي بنت بقى هتلاقي 300 عربية 15 بيغيروا الفردة و23 بيدوقوا الزيت و64 بيتفخوا الكاوتش ببوقهم و47 بيزقوا والباقي بيدوكي رقمهم عشان لو عطلتي تاني تكلميهم، بالنسبة للدليفري، الشيفت يبدأ بتلاتين طيار ونهايته بتلاتة بس فتجنبوهم، عشان عايزين يوصلوا الأكل سخن وبردوا بيوصل بارد.
عربية 128 موديل 86 وبتقول عليه ديزل كإنك رايح تلعب جولف في حديقة الأورمان، "إسمع مني إرمي بوز العربية وسيبها على الله، وهتعدي، ولو قررت تدخل شمال تدي إشارة شمال وزمايلك يشاوروا بأيايدهم وبردوا إبقى تفْ في وشي لو عرفت تدخل شمال، المراية اللي في الجنب مش عياءة وإستخدامها إنك تطبقها عشان تعدي العربية اللي جنبك، إستعد لشتيمتك، ولو وقفت للي بيعدي هتتشتم ولو عديت إنت هتتشتم بردوا، لو في بنت خبطتك أعذرها هي هتخلي بالها من بهاء صاحبها اللي بتكلمه على الواتس ولا المسكرة اللي في وشها، وحزام الأمان عشان الحوادث مش عشان أمين الشرطة، ليه وإحنا داخلين على كمين بنوطي الكاسيت هما هنا عشان ياخدوا الرخص مش عشان ياخدوا الفلاشة".
وتابع: "متتزاكاش وتشغل جي بي إس، عشان بيدخلك أماكن غلط، وبعدين إنت طول عمرك ماشي هلالي هتيجي دلوقتي تعمل فيها بيل جيس، سواقين التاكسي الأبيض لا تلعبوا في العداد الحصان هيشهد عليك يوم القيامة، قسم شرطة يضع حواجز واكلة حارتين من الشارع وأهل الزائر يأخدون شارع وهيتبقى من الشارع نص متر تمشي على سيف العربية نشتري دماغنا ومنعديش من قدام القسم أصلًا".
MBC مصر - أسعد الله مساءكم | ذات مومنت لما بنت تعطل عربيتها على الدائري
Posted by MBC مصر‎ on Thursday, November 26, 2015