عشان تنجح في الحياة لازم تتبع نظرية سواق الميكروباص: 1- لازم تتعود تعمل اكتر من حاجة في وقت واحد عشان تنجز نفسك. فسواق الميكروباص بيسوق وهو بيتكلم في التليفون، وبيسمع أغاني، وبيلم الأجرة وبيرجع الباقي وبيدور للزباين على فكة وبشوف مين نازل وبيوصفلك تروح المكان ازاي بعد ما تنزل وبيقولك الباب بيفتح ازاي وبيهزر مع زمايله السواقين ع الطريق وبيزنق عليهم وبيتكلم مع الراجل اللي قاعد جنبه كل ده وهو بيشرب كوباية شاي وسيجارة كيلوباترا. 2-لازم تعدي مرحلة "الكاكّا" لمرحلة حب "الكاكّا"، يعني خلاص عرفنا ان الواقع زي الزفت وان الحياة "ريحتها وحشة"، وان الدنيا صعبة ومتعبة وناس كتير متعذبة اغلب الناس واقفة عند المرحلة دي ومصدعين ابونا ما عدا سواق الميكروباص اللي وصل لمرحلة ابعد وسبق العالم كله فتلاقيه مثلا بيبدأ يومه بأغاني عدت مراحل "الكاكا" وممكن تجيب صرع لأي حد من الناس اللي قلبها ضعيف لكن هو بيسمعها ومش كده بس لأ ده بيحبها وبيروق نفسه بيها، بالاضافة إنه مش بيشرب سجاير زي "الكاكا" بس لا ده بيقطع الفلتر بتاعها عشان هو مش بمبدأ خلي "الكاكا" عادة. 3- لازم تتعلم تحل مشاكلك بالسلكان ومتخليش مشكلة توقفك. سواق الميكروباص هو الوحيد اللي بتلاقيه ماشي لما الطريق بيكون واقف بيرمي العربية في أي مساحة بين أي عربيتين ويدور عجله رغم ان العربيات كلها واقفه هو بيحاول يسلك نفسه من بينهم ومبيهموش أبعاد بيخش بميكروباصه وعارف انه اكيد ربنا هيوفقه ويفوت ده بالاضافة انه احيانا بيملك حلول out of the box وده مثلا بيبان لما بياخد طريق تاني ويخش من شوارع جانبية يسلك فيها ويوصل قبل كتلة العربيات اللي واقفة في الطريق المسدود. ده الجزء الأول من النظرية هنكمل الجزء التاني، بعد "سطرين" كدا، مش عشان التشويق لأ عشان عندي امتحان ولازم أذاكر دقيقتين لحد ما تعدي السطرين دول.. ____________ ____________ الجزء التاني: عشان تنجح في الحياة لازم تتبع نظرية سواق الميكروباص: 4- لازم جنب الشغل والدنيا الصعبة يكون عندك "بنيّة" بتحبها وبتحبك عشان تهون عليك اللي بتشوفه.. سواق الميكروباص النزيه بيفضي الكرسيين اللي جنبه للمزة بتاعته واللي غالبا بتكون في ثانوي وغالبا بيكون مرجعها من المدرسة وغالبا بتكون معاها صاحبتها عشان تروح ببلاش. 5- لازم تكون علاقتك كويسة مع زمايلك في الشغل وتخدمهم (ما لا يتعارض مع مصلحتك) عشان يشيلوك ويساعدوك لما تحتاجهم.. سواق الميكروباص عمره ما بيتمسك في لجنة عشان بيبقى عارف اماكن اللجان حتى اللجان المفاجأة وده عشان اصحابه بيكلموه لو فيه لجنة عشان يغير طريقه وبيكلموه كمان لو فيه حادثة او الطريق واقف عشان يسلك نفسه ده غير انه لما بيتزنق في فكة بيميل بعربيته على اي سواق صاحبه طالع ع الطريق عشان يفكله ده غير لو اتخانق كلهم بيقفوا معاه ولو العربية عطلت بينزل الزباين يركبهم مع اي واحد صاحبه. 6- لو حصل وتعارضت مصلحتك مع زميل ليك في الشغل "فمصلحتك أولا".. سواق الميكروباص مبيخليش حد يحمل عليه مهما كان حبيبه حتى لو كان الحد ده بيته بيولع ولازم يحمل ويروح بسرعة. 7- لازم يكون عندك واسطة.. سواق الميكروباص دايما ابن خالته امين شرطة وبيجيبله الرخص لو اتسحبت وبيخرجه من القسم لو اتمسك بحاجة. 8- لازم قوانين الشغل تتطبق على اتخن تخين عشان النظام ميحصلش فيه خلل.. سواق الميكروباص مبيمشيش غير لو فيه 4 في الكنبة ورا حتى لو كان فيهم اتخن تخين نفسه وواخد الكنبة كلها. 9- لازم ميبقاش ليك اي ميول او توجهات سياسية انت مع مصلحتك بس.. سواق الميكروباص لو ركب جنبه واحد اخوان هيشتم في السيسي ولو ركب جنبه واحد فلول هيشتم في مرسي ولو الراجل عزم عليه بسيجارة ممكن يلفله أمريكاني بالميكروباص ويتقلبله بيها كمان ميهموش غير ان اللي قاعد جنبه يدفع اتنين مدام خد الكرسي اللي قدام لوحده ويبعد رجله عن الفتيس ويشيل ايده من ع الشباك عشان يشوف الطريق في المراية اللي على يمينه. 10- الوصايا اللي فوق دي ووصايا الجزء الاول كمان لازم وانت بتعملها تكون واصل لدرجة كبيرة من السلام الداخلي والتصالح مع نفسك.. سواق الميكروباص وهو بيعمل الحاجات اللي في الجزء التاني دي والحاجات اللي قولناها في الجزء الأول بيسمع قرآن في أول اليوم عشان الروحانيات واحيانا ياسين التهامي أو العربي فرحان البلبيسي وبعديها بيسمع اغانيه الشعبي طول اليوم وبيرقص مع اصحابه في الموقف عليها وبيركب نور في العربية من ورا بيلعب مع السكسكة بتاعة الاغاني وع الطبلة وع الفرتكة وبعدين بيوطي الاغاني لو فيه أدان مع انه ممكن يكون لسه سابب الدين للكون كله. بالاضافة لكل التناقضات دي بيعلق فواحة من بتاعة الحمامات النضيفة واحيانا بيحط علبة مناديل قدامه فتحس انه نضيف جدا وفي نفس الوقت بيحط جيركن او جردل ورا الكرسي اللي قاعد عليه وبيطلع عين الزبون اللي وراه فتحس انه زبالة اوي، وبيعلق صوره هو وعياله في عفشة العربية وبيكتب اسمه هو وحبايبه في ضهر العربية مع الحكم اللي طلع بيها من الدنيا او ابوه قالهاله قبل ما يموت كل التناقضات دي بيعملها وهو متصالح مع نفسه.