المزة ما تعملش كده .. حلقة رقم (2)

لما تكوني رايحة فرح بالليل وقالبة البيت كله اشي ماسكات بالخيار واشي ماسكات بالزبادي وحاطة ملوخية خضرا علي شعرك عشان تشيل ريحة الجاز اللي انتي مبيتاه فيه من امبارح وربنا يكرمك كده وتجيبي فحلين بنجر عشان تحطيهم علي خدودك قال إيه يعني .. هما حمر لوحدهم ..وتحسي ان كل ده ممكن يبوظ بسبب ان خطيبك أو جوزك مش هيعجبه الفستان اللي انتي هتلبسيه عشان ديكولتيه ومفتوح من الصدر والظهر والرقبة والكتاف بس .. اوعي تعدي تتخانقي مع خطيبك وينجح في انه ينكد عليكي ويعيطك ويضيع تعب ومجهود يوم كامل قضتيه في المطبخ عشان شعرك ووشك .. المزة ما تعملش كده.
المزة تجيله بحنية وتقوليله .. يا حبيبي انا هالبس تحت الفستان "بودي " بيبرق وملعلط و بكم كمان .. هو انا برضه اقدر اعمل حاجة انت ما تكونش راضي عنها .. واول ما توصلي الفرح ادلقي نص كوباية شربات علي البودي واعملي نفسك هيغمي عليكي وادخلي الحمام اقلعي البودي واديها رقص من غيره .. هو ده كلام المزز ولا بلاش !