10 نصائح لخريجي «تجارة إنجليزى» 2017

قدم محمد محمود رضوان، أحد خريجى كلية التجارة وإدارة الأعمال بجامعة حلوان، عددا من النصائح لخريج تجارة إنجليزي دفعة 2017، للعثور على وظيفة بعد التخرج، وكيفية تقديم "سي في" متكامل.
وقال في أول نصائحه: "أحب أنبهك إن دفعتك لسه مطلبتش في البنوك أو في الشركات الكبيرة، فبلاش تسجل بياناتك على إنك خريج 2016، لأنهم لو بعتولك على أساس إنك خريج 2016 مش هتقدر تدخل الامتحان ومتستعجلش على رزقك.. تريث".
ثانيا: "حاول تقوى نفسك في الإنجلش وتاخد فيه كورسات واهتم إنك تعرف أساسيات المحاسبة والاقتصاد، ومتنساش تعمل CV كويس وحاول ميبقاش ملون ولا فيه أخطاء".
ثالثا: "على قد ما هتجتهد على قد ما هتلاقى وبلاش ترمى شماعة فشلك عالواسطة، زى ما في ناس بتشتغل بالواسطة برضه في ناس تعبت واشتغلت بمجهودها".
رابعا: "كونك خريج جديد ده بيعلى فرصك في إنك تشتغل في مكان كبير وده لأن مرتبك هيكون صغير وهيعرفوا يبهدلوك، المشكلة إنهم بيطلبوا شروط زى إنك تكون قوى جدا في الإنجليزي والمحاسبة، لو عرفت تظبط دول مبروك مقدما على الشغل".
خامسا: "مفيش شغل سهل بس فيه شغل صعب ب1500 وشغل صعب ب4000، وانت وشطارتك".
سادسا: "سعيك الدائم لتطوير نفسك ده هيخليك تتنقل من مكان لمكان احسن بس حاول انك متكسلش عشان توصل للى انت عايزه، وحاول دايما أنك تستغل أي شغل تشتغله في إنك تكتسب خبرات تساعدك لما تسيبه وتروح مكان تاني".
سابعا: "البنوك مش املة شغلها متعب ومقرف والغلطة فيها بفورة ده غير أن افخمها بنك في مصر يوم ما هيشغلك كبيرك هتاخد 3500 جنيه، بس مستقبلها حلو لو اجتهدت، ونفس الكلام ده ينطبق عالشركات الmultinational".
ثامنا: "سد ودانك وأنت بتسمع كلام المحبطين، الفشلة مش بيحبوا حد ينجح".
تاسعا: "رحلة البهدلة وإحنا بندور على شغل كلنا مرينا بيها، بس اوعى توقف طريقك لحلمك عشان يأست، الحياة مقاوحة".
عاشرا: "كونك تجارة انجلش ده هيسهل عليك فهم مصطلحات الشهادات المهنية (CMA - CPA - CFA)، وبرضه هيديلك افضلية في إنك تشتغل في بعض الأماكن الكبيرة زى (KPMG حازم حسن وبنك CIB)، لكن مش معناه خالص انك هتتخطف في بنوك وشركات وانك هتتعين من أول ما هتتخرج، لو بتاع تجارة عربى qualified اكتر منك هو اللى هيتعين".