أبين زين

نادوا وزير المالية.. الجنيه زعلان.. بيقول بقى سعرى أرخص من نفس دخان.. نفسى فى مسئول يقول لى.. سعرى إيه بأمان.. ولحد إمتى كدا حأفضل رخيص غلبان.. وقولوا مين السبب فى هبوطى يا إخوان.. أنا كل يوم أترمى فى الخزنة مش دريان.. والمسئولين عنى شايفنى كما الددبان.. أطلع وأنزل كأنى دخلت فى مورستان.. ما أعرفش إيه السبب غير إن فيه غليان.. وحكومة رايحة وجاية.. كل يوم الوان.. حرام عليكم بقى سعرى تعب دوبان.. من الوزير للغفير ماعدش ليَّه مكان.. طيب قولوا لى بقى مين اللى له سلطان.. يقدر يرجع لى سعرى اللى كُنْتُه زمان.. هى الوزارة بتعمل إيه.. قروض ولجان؟.. يافرحتى بالحكومة كل حبة بيان.. سعر الجنيه إنخفض.. يامصيبتى أنا سكران.. مش دارى إيه اللى جارى.. وإنتوا فى الميدان.. بتهتفوا الثورة قامت.. واللى ثار قرفان!!.. بيشترى بالجنيه لقمة وهو جعان.. أنا قلت كل اللى عندى ياوزير وكمان.. عمر الجنيه ما ارتفع وإنتم فى كنا وكان.. إبقى قابلنى بقى فى البورصة مش دريان.. ياميت خسارة ياميلة بختى يا إخوان.. أنا الجنيه اللى سعرى كان فى كل زمان.. له قيمة أصبح رخيص.. أخرص مالهش لسان.. والرمل قال والودع.. كل اللى شافُه وبان.