شلاليت

حتخُدنا لفين.. وتجيبنا منين
وحتعمل إيه.. كلنا فاهمين
كلنا عارفين إنك محتاس
وبفكرك تايه بين الناس
وف كل شوية خطب وحماس
وتقول يا إخوان أنا فوق الرأس
ومتربس بابى هنا بترباس
وإنتم يا حبايبى بقى الحراس
أحسن فيه ناس عايزين أنداس
لكن أنا فاهم أى مساس
حيقرب منى.. فى إيدى الفاس
وحاكَسَّر رأسه بدون إحساس
أنا عارف فيه فوضى وإفلاس
وبأن شعوركم.. فيه وسواس
عايزينى أجيب كل الأجناس
وأعمل تنظيم.. على أى أساس
هو القلقاس زى الأناناس
مين فيكو يقول لى بأى مقاس
أقدر أراضيكوا فى دورى وكأس؟
أحسبها إزاى أخماس أسداس
طيب اسمعنى بدون أحداث
أنا عايزك تكتب فى الكراس
حتخدنا لفين.. وتجيبنا منين
كلنا عارفين إنك محتاس