ايمن مختار غازى يكتب : دنيا تانية

إنا عارف يا ولادى إننا بجد فى بينا ناس فى دنيا تانية منهم يمكن أمي أختي و اخويا ممكن جيرانا ممكن أختك أخوكى مرتاحين و الراحة يعنى إحساس جميل مش عايزين يسبوها بيقولوا ما إحنا برضه عايشين تمام ملناش علاقة بالنظام بناكل بنشرب مستورين لينا ميراث عايشين حياتنا عايز نسيب كل ده علشان عيال قالت لحسنى لا ارحل بعيد؟
انا عارف إن فينا ناس عاشوا مستورين بحيط ماشين فى ظلة طول حياتهم خايفين نهد الحيط عليهم الشمس يعمى عينيهم ضيها
والله يا ولادى إحنا كلنا فقنا على صيحة بطل واحد كأن كل صوتكم خرج من قلب واحد و جسم واحد يطالب بسقوط النظام
لقينا اعلامى كبير بيهاجم كل اللى لاذوا بالميدان لأنه يا عينى كان فاهم غلط فاهم إن فزاعة النظام ماسكة اللجام وهى اللى سايقة الخلق بتنادى بسقوط النظام
مكنش يعرف ان الميدان فيه شبان أبطال ليهم قيادة غير كل اللى فات قيادة كل واحد فيهم بطل قائد ليهم طلب هو رحيل مبارك من البلد
لى سؤال يا رئيس البلد بتعرف تنام مفيش مرة جيت تحط راسك على المخدة لقيت شهيد نايم فى حضنك بيسالك ليه كده؟ أنا ذنبى أيه؟ كل اللى كنت عايزه انى أعيش زى اللى عايشين بكرامة أعيش عيشة مفيهاش أهانه إن مصر ترجع تانى دولة كبيرة قائدة ورائدة فى منتصرة على كل العدا
مسمعتش مرة صرخة بتطلع من نفوخك تقول لك ليه خليت كلابك عذبونا ليه سرقت لقمة من شفايف طفل تايه فى البلد من يوم ما جبت لنا العصابة تنهب وتسرق فى البلد
مخفتش مرة من الحساب من العقاب من ربنا. طيب كفاية ده إحنا شعب كفران بنعمة ربنا شبعنا من النعيم اللى بنرفل فيه كلنا و الأمان اللى أنت موفره لكل واحد مننا عايزين بجد انك تجرب تعيش بدون وجع الضمير ونعيش كمان بدون نعيم جنتك
بجد أنت اكبر من انك تحكم شعب جاحد زينا بس بلاش يكون عقابك لينا انك تسيب لنا نائب رئيس برضه هو أنت تحكمه فى رقابنا و تتحاسب على كل اللى ناوى يعمل فينا قدام ربنا
بجد حافظ على اللى فاضل من حب شعب كان بجد بيحبك وأنت شفت ازاى وقف معاك فى كل محنة مش لانك رئيس انما بصفتك واحد مصرى مننا
كان فين ضميرك و العصابة بتمص كل نقطة فى دمنا كان فين ضميرك وأنت بتكنز فلوسنا وإحنا مش لاقيين حق الدوا ولقمة حاف تسد جوع طفلين صغار بيبكوا عايزين يعيشوا برضه زيكم
طب تيجيى نقسم على الشعب الصبور ده كل قرش خدت منهم أنت و كل مسئول جبته يمص دمهم بذمتك نصيب كل فرد كل شاب و كل طفل حيكون معاه كام من ثروتك
كلمة أخيره سيبنا فى حالنا وارحل بعيد عننا