"قصيدة العام الجديد" شعر "هشام الجنيدى"

هشام الجنيدى شاعر له العديد من الأشعار المنشورة، كتب عن العام الجديد يقول:
بعد كام مليون سنة وبعد ما فات اللى فات
وعام جديد لساه بيبدأ يا بلادى من سكات
بكرة يبقى زى غيره يعنى يصبح ذكريات
وانتى كده .....
مكتوب تعيشى منكدة
ومتهددة
مكتوب تعيشى جوة سجنك...
والإيدين متأيدة تستنى دورك فى الموات
مفتاح قيودك كان معايا لكنّه راح
أخده سجانك بجبرى....
تحت تهديد السلاح
وقنابل الدخّان عمتنى ...
وتوّهتنى عن الصباح
كنت عاوز حتى أصرخ أجبرونى على السكات
آه وآه وآه وآه ...
جرح منّى ومن سنينى بينتقم
جرح متلوث خيانة ...
يعنى عمره ميلتئم
يا هل ترى يا عام جديد فيك وَرْدِنَا راح يبتسم
ولا فيه من لسّه عاوز يقطفه ....
ويسيبه يدبل فى الفازات
يا هل ترى فيك التفاؤل والأمل
ولّا الخيانة داء وباب لن ينقفل
يا هل ترى يا عام جديد هتكون سعيد
ولا جيّلنا وجايب كاس هموم مليان آهات
يا هل ترى يا نيل هتفضل
زى ما انتا ولّا حر
بطئ سريانك وعجزك....
خلّا طعم المية مر
بس انا مضطر أشرب
أصل لو ما اشربش اموت...
زى غيرى فوق ترابك من جميع المخلوقات
خايف يا نيل ....
عامنا يبقى عام خراب
يبقى عام غربة وضياع
واقرا يافطة فوق ضفافك ...
يا بلد نيلك مباع
والتمن رخص التراب
والمشترى ....
هوه نفس المشترى اللى اشترى....
بفلوس أبونا نهر دجلة والفرات
خايف اصبح والقى اسمك يا بلادى
عرض مغرى جوة جرنان اعلانات
خايف اصبح القى إنى مليش وطن
أنام فى حضنه بعد لفّى بالساعات
وكل خوفى لما اموت....
أسّاب اعفن فوق ترابك
زى كلب حقير وماااااااااات .....