الحبيب ولا العريس؟!!

أولاً أنا باشكر كل أسرة "بص وطل" على كلامها الحلو والمفيد جداً، ووقفتها بجد جنبنا، أنا عندي 22 سنة مرتبطة بشاب في الامتياز، كنت عارفاه وهو لسه طالب وكنت أول حب في حياته، ما كنش يعرف يعني إيه حب ولا يعني ارتباط أساساً، فسلّم قلبه ليّ لأني بحبه وكان متأكد من كده.
المهم إحنا سيبنا بعض مرتين بحجج عبيطة في كل مرة، مثلاً.. إنه مش قادر يحبني أو مش عارف، ومرة لأني مش دكتوره زيه!! أهي حجج واهية وخلاص، المهم إن في كل مرة باحس إنه ما بعدش عني وإنه هيرجع ليّ تاني، وفعلا آخر مرة رجع ليّ وندم جداً على المرتين اللي سابني فيهم، لدرجة إنه كان عايز يبوس رجلي علشان أرجع، وطبعاً علشان أنا عايزاه رجعت له بس فيه جوايا دايماً حاجة إن هتحصل حاجة وإنه هيسبني برضه مش عارفة أثق فيه، حاجة مكسورة جوايا بس عمري ما هقولها له وخايفة.
ودلوقتي في عريس شاب ممتاز في كل حاجة، مهندس بترول وبيحبني محتارة بين الاتنين، وطبعاً اللي مرجح الأولاني عندي إني أعرفه جدا، وعارفة حياتنا هتبقى ماشية إزاي! إنما التاني عريس عادي جديد وغريب عني خايفة أرفض العريس ويبقى كده ضيعت فرصة من إيدي، وخايفة أسيب الأول ألاقي التاني مش عارفة أتفاهم معاه يا ريت ألاقي حل... أختار مين حبيبي الأولاني ولّا العريس اللي ما يتعوّضش؟!!
واحدة محتارة جداً

لو عايز تفضفض لنا دوووس هنا