نائبنا من المريخ.. عايش في مية البطيخ

الناس خيبتها السبت والأحد.. وإحنا خيبتنا ما وردت على حد.. أي والله «زمبقولكم كدا».. أصواتنا راحت هدر.. وآمالنا راحت هباء.. الحكومة تتفنن في إذلالنا.. ونوابنا ولا كأنهم هنا...
وأنا بقى جمعتكم النهاردة يا أبناء دائرتى الكرام علشان تشوفوا نائبكم اللى بيمثلكم في البرلمان.. أو اللى كان بيقول إنه ممثلكم في البرلمان.. أو اللى أنتم ضحكتم على أنفسكم وقلتم إن دا هو نائبنا تحت قبة البرلمان.
نائبكم اللى نجح بالقايمة.. ومن يومها وهو عينه نايمة.. لا سمعنا له حس.. ولا له عندنا لأزمة.. السكر يختفى وهو ولا هو هنا.. السكر يرجع وبرضو هو مش هنا.. تذكرة المترو تبقى ب 2 جنيه وهو ولااااااا كأنه عايش وسطينا.. بطاقات التموين بقت ذكية وصاحبنا لسه بيقول إن تهنئة المسيحيين في أعيادهم الدينية حرام.
للأسف نائبنا سلفى.. لا حس له ولا صوت.. وكأنه قاعد في البرلمان مكبوت.. لا نراه إلا في مناسبات الأفراح والموت.. ليس له طلب إحاطة.. وليس له استجواب.. مالوش دعوة بالحكومة ولا حتى بالإرهاب.. نائبنا كأنه من المريخ.. عايش في مية البطيخ.
نائبنا مالوش دعوة بالدايرة.. ولا له دعوة بالشعب أصلا.. لا عمرنا شفناه بيطالب بحقوقنا.. ولا عمرنا سمعناه بيتكلم بلساننا.. وكأنه وصل للبرلمان بالكوتة.. يعنى خد نصيبه ضمن مجموعة النواب السلفيين اللى دخلو البرلمان مقابل بيعهم للإخوان.
نائبنا بيحضر كل الجلسات علشان ياخد المرتب والبدلات كاملة.. ورغم ذلك لم يطالب يوما بأى خدمة للدايرة..
عموما هي دى نتيجة أصواتكم التي بخلتم بها عليا أنا ابنكم حامل همومكم.. إشربوا بقى.. آدى نائبكم طلع سلفى أهه!
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016