أحلام بكار.. حلقة رقم (37).. الكاريكاتير سلف ودين من أيام مصطفى حسين!

التقى بكار وحمزاوى على مقهى عبد الحليم حافظ فى ممر الألفى بوسط البلد، وراحا يتبادلان أطراف الحديث كعادتهما، لكن رغم أن الجو كان متوترًا من الأحداث السياسية التى تمر بها مصر هذه الأيام من الفتنة الطائفية، وأحداث الخصوص والكاتدرائية، إلا أن البسمة والضحكة عرفت ووجدت طريقها إليهما من خلال رسم كاريكاتيرى لرسام فرنسى عن محمد مرسى..
"بكار": إيه الأخبار؟
"حمزاوى": تمام.. نحمد ربنا، ده على المستوى الشخصى والعائلى، لكن على الصعيد الوطنى ليس على ما يرام، وما يرام غير ما يحدث يا "بكار".
"بكار": أنا عارف.. قصدك أحداث الفتنة، بس حتتلم، الجيش حيلمها وحكمة تواضروس حتساعد كتير فى الاحتواء؛ لأن اندلاع الفتنة مصيبة فى وقت زى ده.
"حمزاوى": كلامك صح يا "بكار"، الوقت ده ماينفعش تحصل فيه فتنة طائفية، البلد تولع أكتر ماهى والعة، كفاية عليها الانقسام بين الناس بسبب الإخوان ومرسى ما بين مؤيد ومعارض.
"بكار": إنت شوفت الكاريكاتير الفرنسى عن مرسى؟
"حمزاوى": أيوه شوفته، ده حاجة تكسف وتجيب العار لمصر.
"بكار": راسمين مرسى شحات بيتسول.
"حمزاوى": هو اللى وصّل نفسه لكده، ما خلّاش بلد ماشحتش منها، أو راح يشحت منها، بدل مايحاول يفكر إزاى يدور عجلة الإنتاج خلّى منظرنا وحش.
"بكار": ماهو انت لما تيجى تقول كده تلاقى الإخوان بيقولوا: الشغب والاحتجاجات والاعتصامات والمظاهرات هى اللى مش مدياله فرصة يشتغل.
"حمزاوى": دى الشماعة اللى الإخوان بيعلقوا عليها فشلهم.
"بكار": زمان كان القذافى حيتجنن من رسام الكاريكاتير مصطفى حسين، كان دايمًا يرسمه وجنبه قصرية بيبى، وياما اشتكاه للسادات، والسادات كبّر دماغه علشان كانت بتعجبه رسوم مصطفى حسين عن القذافى، تلف السنين وييجى اللى يرسم رئيس مصر شحات متسول ويضحّك العالم عليه، باين الكاريكاتير ده سلف ودين.
"حمزاوى": ده كمان مدير إدارة السينما فى قصور الثقافة قرر عمل شخصية كرتونية لمحمد مرسى، يعنى مش الأجانب بس اللى بيفكروا فى مرسى كده، ده المصريين كمان.
"بكار": هو فعلا يصلح شخصية كرتونية .
"حمزاوى": بيقولوا إن المتتالية العددية بتاعته بتاعة 456732 من أسباب ضحك المصريين عليه، وكمان رجوعه فى قراراته وإشاراته وأسلوب كلامه ولغته الإنجليزية الضعيفة، وعدم مبالاته بما يحدث حوله فى مصر، الدنيا هنا تبقى تخبط تقلب تضرب وهو سايب كل ده ورايح يسافر يشحت ويحل مشاكل ناس تانية، ده جنان رسمى وقلة وعى وعدم إدراك للمسئولية.
"بكار": بكره لما الكاريكاتير ده يتنفذ ويتصور زى "الدياسطى" كده الإخوان حيقدموا ألف دعوة بوقف الكاريكاتير، وغلق القناة المذيعة له، وحيطلبوا من النائب العام التحقيق مع المؤلف والمخرج وصاحب الفكرة، زى ما حصل مع باسم يوسف بالظبط.
"حمزاوى": على قولك!! مش بعيد ده يحصل، ماهو حرية الفن والإبداع انداست بالجزم فى عصر مرسى.
"بكار": ساعتها حيقولوا إنه مش فن، ده سب وقذف وسخرية من الرئيس.
"حمزاوى": العيب فى الذات الملكية رجعت من تانى فى عهد الإخوان.
"بكار": صح كلامك يا "حمزاوى".
"حمزاوى": معلش، كله بياخد وقته ويزول.
"بكار": شدة وتزول ويزيح ربنا.
"حمزاوى": يلا نقوم ونتقابل كمان يومين، عندى مقال عاوز أكتبه.
"بكار": وأنا كابس عليّا النوم، يلا بينا.
"حمزاوى": يلا يا "بكار".