ال«فيس بوك» يقدم 11 طريقة لمعرفة خيانة زوجك

عبر صفحة «افتكاسات مصرى أم الأجنبى» وضع الشباب 11 نقطة تمثل خريطة لمعرفة خيانة الأزواج، الخريطة تضمنت علاقة الزوج بموبايله، وكيفية استخدامه لبريده الإلكترونى، وقال أدمن الصفحة: "إزاى تكتشفى خيانة زوجك ليكى ركزى يا مدام"..
1- الموبايل.. بيحطله كود سرى.. ميتفتحش غير برقم سرى.
2- الموبايل بيبقى فى وضع صامت فى بعض الأحيان من غير مبرر، وإذا سألتيه يقولك مش عارف بقى صامت أزاى.. سبحان الله يا أخى.
3- إذا رن الموبايل يروح باصص عالرقم ويقولك.. واحد صحبى مش عايز أرد عليه.. رغم إنك مسألتيهوش.
4- الموبايل مبيفارقش إيده لأنه خايف يقع فى إيدك وتكتشفى أو تستنتجى حاجة.
6- يمسك الموبايل ويوصلك إنه فاتح الألة الحاسبة، أو موقع إخبارى، وهو بيرد على المسجات اللى بتيجى.. وكل شوية يرميلك كلمة تخص الأخبار أو أى حاجة تانية.. آل يعنى بيقرا، ومنفعل بالأخبار اللى بيقراها..
7- لو لاقاكى مسكتى الموبايل فى لحظة غفلة منه.. يجرى عليه يقولك هاتى صحيح.. ده أنا لازم أكلم كذا، أو البرنامج الفلانى بيتحمل.. أوعى تفتحى حاجة.
8- أول ما يفتح عينه الصبح يمسك الموبايل يشيك على البريد الوارد، والرسائل الواردة.
9- لو لقيتى أسماء غريبة على موبايله.. مثلًا أبو ملك.. أبو بدور.. حروف إنجليزى كأنها اسم شخص أجنبى.. كدا يعنى.
10- إذا كان بيستنى نومك أو انشغالك بفارغ الصبر عشان يقعد عالنت براحته.
11- لما تلاقى البريد الوارد سواء عالموبايل أو الفيس بوك أو الإيميل ممسوح أول بأول.. والصادر والوارد من موبايله.
لو عندك 3 نقط من دول موجودين فى جوزك.. انتبهى.
لو 6 شغلى خاصية الانتباه، والتركيز، والتفحيص، والتمحيص، وحطى الضحية فى دماغك.
لو أكتر من 6.. حضرى الأكياس البلاستيك، والسكينة المسنونة.. والديتول عشان تطهرى مكان الجريمة.. وربنا يقدرنا دايما على فعل الخير.