افرض جدلًا..!!

صحيت من النوم لاقيت جنب رأسك 3 ورقات، الأولى من المدام: معلهش يا حبييبى أخدت من جيبك 50 جنيه عشان الفلوس خلصت.
والتانية من بنتك: أنا آسفة يا بابا، والله "المستر" هددنا اللى مايشترى المذكرة النهاردة لاتبقى وقعته سودة، وأنا عارفاه مدرس ابن "........" ممكن يخلينى أعيد السنة 5 مرات، فقلت لنفسى: ما جاتش من 50 جنيه، وربنا يخلى بابا.
والتالتة من ابنك: صباح الخير يا أحلى أب فى الدنيا، ماما أخدت منك 50 وأختى أخدت 50، وحسب الشريعة للراجل قد الاتنين، عشان كدة أنا أخدت 100 جنيه يا معلم، أصل الظروف يا برنس وحشة قوى.. والنهاردة عندنا خروجة عزمت اصحابى من أسبوع عشان نتفسح، بصراحة العيال اللّبط أكلوا وشّى، يرضيك أفضل من غير وش قدام صحابى!! لأ طبعا، ويرضيك أطلع صغير والناس تقولك يا ابو الصغير بروضو؟ لأ طبعًا، عشان كدة أخدت 80 وسبت لك 20 جنيه عشان تروح الشغل، ماهو اللى عنده دم أحسن من اللى عنده فدان أرض، على رأى واحد صاحبك. وصباح الفل، وصباحك أحلى من الفلوس يا برنس، ابنك المحترم.
طب لو انت مكانى تعمل إيه؟!