بالصور.. أطرف مواقف زواج الصالونات وجلسات التعارف.. أمنية: «قالي لو بطلتي شتيمة هتجوزك».. ولاء: «سألني على مرتبي ولو ليا ورثة».. وفرج:«أبوها قعدها في البلكونة عشان مش بتحب جواز الصالونات»

روى مستخدمو موقع التواصل الاجتماعى "فيس بوك"، مجموعة من مواقفهم الطريفة خلال توجههم لخطبة فتاة أو مقابلتها في جلسة تعارف، وكذلك المواقف المحرجة التي مرت بها الفتيات بسبب جلسات زواج الصالونات.
- اندمجوا في الماتش ونسيوا العروسة
قال محمد: "لما رحت اتقدمت دخلنا قعدنا في الصالون أنا ووالدي كان ماتش الأهلي شغال العيلتين اندمجوا مع الماتش ونسيوا احنا جايين ليه، وأنا قاعد محرج بشاور لوالدي عشان يفتح الموضوع راح زعقلي، وعلا صوته وقالي هي العروسة هتطير اصبر هنتكلم بعد الماتش".
- مرتبك كام؟ وليكي ورثة؟
أضافت ولاء: "حكالي أديش راتبك؟ وملكيش حدا يورثك؟ حكتلو اطلع برة وخود الباب بطريقك".
وقالت شهد: "قالي بصي بيني وبينك كده أنا موافق ومش عايزين نضيع وقت في التفكير والكلام ده.. وأنا عموما جاهز وهنعمل الفرح بعد شهر من دلوقتي عشان أسافر.. زعقتله قولتله انت جاي تشتري تلاجة.. وطلعت موبايلي قولتله شايف ده أنا قعدت أحوشله سنة عشان أجيبه وفضلت شهرين بس أفكر أجيبه ولا لأ انت تقولي نتجوز في شهر.. المقابلة انتهت يااستاذ".
- لو بطلتى شتيمة هرتبط بيكى
وأضافت أمنية: "لأ الصراحة جالي واحد غريب أوي ما جاش زارنا في البيت بس زار الأكونت وفضل يدور على شتيمة لحد مالاقاني شاتمة شتيمة طفيفة كدة ومش عيب قال إني لو بطلت شتيمة هيرتبط بيا رسمي من ساعتها وأنا بشتم بسبب ومن غير سبب وعلى الأكونت وفي كل حتة عشان الظرف ده".
- بقولها مبروك قالتلى عقبالك
وقال أحمد: "كنت مع واحد صاحبي وكان بيحبها وهي متعرفش ولما قعد معاها وأنا فضولي خلاني أركز هيقولوا إيه أول كلمة هو قالها أنا مش مصدق إني بكلمك ده كان حلم، قالتله تحب اديك بالقلم أفوقك وأنا كنت على الأرض من الضحك".
وأضاف عمرو: "مراتي بعد ما اتفقنا وخدت رقمها وأول مرة بكلمها على الفون بقولها مبروك قالتلي عقبالك".
- عبيط وطفس
وقالت سوسن: "كان كل شوية يقولي كلي جاتوه ويلعبلي حواجبه وأنا قاعدة هموت من الضحك، دخلت لماما المطبخ قولتلها دا عبيط وابن أخويا الصغير كان واقف معانا وأنا بقول لماما دا عبيط وطفس.. راح قال لبابا قدمهم شروق بتقول على عمو عبيط وطفس".
مبتحبش جواز الصالونات أبوها قعدها في البلكونة
وأضاف فرج: "أعرف واحد اتقدم لواحدة قالت لأبوها مش عاوزة أتجوز جواز صالونات أبوها خده وقعد في البلكونة".
وقال رضا: "أول واحدة اتقدملها كانت زوجتي قعدت طول الليل أتوقع الأسئلة وأحضرلها إجابات، لحد ماروحت قابلت حمايا لقيته بيقولي انت بتصلي؟ قولتله أيوة الحمد الله أنا خريج أزهر وحافظ القرآن، قالي ابقي هات أهلك وتعالي ومتكلفش نفسك خليك تتجوز بسرعة".